Sa luyo sa akong hunahuna (usahay gud hunahuna ra nakoy gadaku), ga plano ko nga maghimo’g mubong pelikula kabahin sa usa ka Sinulog dancer nga gikawatan sa iyang imahin nga iya untang isayaw. Nakatagpilaw siya ug sa iyang pagmata wala na diha ang imahin. Natarantar siya apan gasugod na ang binunalay sa mga tambol, ang bulhot sa mga turotot ug ang tagingting sa mga lyre. Mikaging ang dancer apan gibira siya’s iyang mga kauban ug giduot ngadto sa tunga para pasayawon.
Ug tuod man misayaw siya nga walay imahin nga gidala ang iyang kamot. Ang nahimong dako’ng milagro mao nga walay nakabantay nga walay imahi’ng gibayaw ang mga kamot sa dancer. Hasta ang mga hurado daw may nakit-an ra man nga gibitbit ug gisayaw ang dancer. Gani, ilang gipadaug ang contingent sa dancer. Tungod sa stress nakuyapan ang dancer paghuman niya’g sayaw. Dihang gidala na siya sa ospital diha pa nangita ang iyang mga kauban sa maong imahin.
Nakuratan ang mga hurado nga pag review nila sa video wala man diay dala nga imahin ang dancer apan nahatag na nila ang ilang hukom. Ambot lang kon makahimo ba kaha akog short film base ning maong plot nga akong nahunahuna-an. Free for all na lang kon dunay filmmaker nga interesado niini.
Mibalik kining maong plot sa akong hunahuna dihang nabasahan ko kining gikataho’ng pagkidnap ni Prince Niño gikan sa kamot sa iyang inahan sa usa ka call center agent nga nag takuban isip usa ka nurse. Sumala sa mga taho gihimo niya ang maong krimen para paglingla sa iyang kapuyo nga ila kadtong bata. Mibiya na kaniya ang maong live-in partner (nga call center agent usab) ug buot niya kining danihon pagbalik pinaagi sa bata. Maayo na lang kay nabawi sa mga awtoridad ang bata ug anaa na karon sa iyang mga ginikanan.
Samtang gahuwat ko ug update kabahin sa maong hitabo sa mga news teaser sa TV, mao hinuo’y akong nakit-an ang taho kabahin sa lawas sa usa ka aborted nga bata nga nakit-an sa kadaplinan.
Ug diha usa’y news runner ubos sa maong taho kabahin sa usa ka lola sa Texas nga nahimong surrogate mother kay diha man gitanom sa iyang lawas ang fetus sa bata.
Kining tanan nahitabo samtang gasingabot ang Sinulog. Ug samtang natagamtam sa tibuok kalibutan karon ang mga dautang panahon (forest fires, tornados, cyclones) tungod sa El Niño. Tingali mityabaw ang bata kay atong gibinuangan ang iyang duyan nga mao ang kalibutan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
