Pagkahuman sa bagyong Yolanda daghang naningkamot nga makatabang sa mga naigo sa maong katalagman.
Sama sa atong higala nga si Clayton Tugonon nga nangitag mga paagi nga mahimuag bangka ang iyang mga silingang mananagat sa San Remigio ug sa mga lakbit nga lungsod. Daghan ang miduyog sa kawsa ni Clayton.
Mahinumduman ko pa ang baga nga pundok sa mga volunteers nga mitabang pag putos sa mga donations nga midagsa sa CICC sa north Reclamation Area. Ga-shifting silag schedule kay daghan kaayo ang ilang pustunon kay daghan man usab kaayo ang mga nidagsa nga hinabang gikan sa lain laing bahin sa nasud.
Buot nakong patampuhon niadto ang migala kong maniniyut mao naghunahuna ko aktibidad o kalihukan diin ang mo amot o muhatag og hinabang ang mosalmot niani.
Ni message ko ni Jaja Chiongbian Rama kon duna ba siyay mga higala nga guapa nga uyon ra nga kuhaag portrait. Ang mga mokuha kanilag portrait mao ang mga photographer nga mo donate para sa mga survivor sa bagyo.
Mitubag kanato si Jaja nga mas maayo pa kon ang mga kandidata sa Miss Cebu 2014 maoy himuong subject sa maong activity. Ug tuod man ang mga kandiata ug ingon man ang mga mananaug sa mga miaging Miss Cebu pageant maoy nahimong portrait/subject sa photo shoot.
Dili kini original idea nako. Niadto pa, basta dunay katalagman nga mudagsa ang pundok ni Super Lolo Ben Shan mo himo dayog photo shoot diin pangayuag donation para hinabang sa mga naigo sa kalamidad ang mga maniniyut nga moapil.
Naniid una ako kon duna bay nagpasiugda og ingon niani nga kalihukan apan wala akoy nasugatan mao nga ako na lang kining gisugdan. Dunay mga duol sa 30 ka maniniyot nga miapil sa maong kalihukan nga gitawag natog “Redeeming Beauty.” Didto gihimo ang maong photo shoot sa The Henry Hotel.
Tungod kay nag malampuson man kini gisundan dayon nato kini sa “Kaanyag sa Pasko” nga didto gihimo Adnama building diin ang establishment nga Chillage ug Level 8 mihatag kanato og lugar.
Matud pa sa Executive Director sa Cebu City Tourism Commission nga si Cinbeth Orellano ang mga hinabang gikan sa mga photographer maoy nahimong unang deposito para sa “Balik Balay Community.” Tungod kay daghan naman kayo nga tubig ug pagkaon ang nidagsa nakahunahuna ang Cebu City Tourism Commission nga adto nalang idapat sa low cost housing project ang donation gikan sa “Redeeming Beauty” ug “Kaanyag sa Pasko.”
Usa ka tuig human sa maong katalagman daghan pa gihapon sa atong mga kaigsuonan sa amihang bahin sa atong lalawigan nga wala pay atop kapasilungan. Ug tungod niani atong himuon ang “Redeeming Beauty 2.”
Adto himuon sa Chateau de Buasay ang photo shoot karong December 7. Ang mga kandidata para sa Miss Cebu 2015 ug ingon man ang mga past winners sa maong pageant mao ang mga subject sa maong photo shoot. Maayo kon daghan kanatong mga lensfolk with a heart of gold ang mo join niani. Gibanabana nga tag dyes mil ang matag payag nga pagahimuon sa Balik Balay Community. Mas mahal pa ang kasagarang budget zoom niani.
Susiha lang sa https://www.facebook.com/groups/redeemingbeauty13/ ang uban pang ditalye.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
