Simbako labngon og pito ka lawod mahitabo dinhi sa Sugbo ang pagpamomba didto sa dakbayan sa Davao niadtong Biyernes sa dayong lawom na’ng gabii diin 14 ka mga kinabuhi ang nakalas ug dunay 67 ang nanga-angol.
Kung nalutsan ang Davao sa mga terorista, posible nga malutsan sab ta dinhi sa Sugbo ug ang ubang mga dagkung Siudad.
May rason si Presidente Rodrigo Duterte nga mideklarar na og state of lawless violence nationwide isip Commander in Chief.
Mao na ni’ng sitwasyuna nga palig-onon ang seguridad sa atong gobyerno pinaagi sa mga sakop sa militar ug kapolisan.
Nakasabot ko sa reaction sa taga Davao ilabina sa atong mga otoridad nga mihimo na karon og subsob nga checkpoints sa mga lugar kay didto man nahitabo.
Apan with all due respect, ang mga terorista nagpalayo na karon sa Davao human milampos sila sa terror attack gawas nga nakabantay na sila sa full security alert status nga gipatuman.
Ang mas kulba karon mao ang Metro Manila ug dinhi sa dakbayan sa Sugbo nga wa mangandam.
Mao ra ba gyud ning mga terorista nga kung asa ang huyang nga seguridad adto ilusad ang pagpangataki.
Ingkaso man kita maoy mabiktima, unsa naman tuod kita ka andam nga mo-responde ug moatubang sa problema?
Unsa man ka lig-on ang seguridad sa atong mga tugpahanan, mga terminal, mga mall, mga gasoline station, simbahan ug sa mga lugar nga hugpaan sa katawhan?
Dinhi sa dakbayan sa Sugbo panahon na gyud nga atong ipatuman sa hingpit ang curfew ordinance, pag-ban sa mga dagkung kalihukan sama sa Sinulog parade, night market, disco ug uban pa.
Apan kinsa man gyud ang responsable sa pagpamomba nga gigamitan og improvised explosive device?
Mga terorista gyud kaha? Wa kaha magkonsabo ang mga terorista ug mga drug lord aron gubton ug lawgawon nila ang seryosong kampanya sa Duterte administration batok sa illegal drugs?
Granting nga duha ka babaye ug usa ka lalaki maoy mga responsable, dili kaha kadto kabanay sa mga biktima sa summary execution, vigilantes style ug extra judicial killing agig panimawos ug aron pakauwawan ang presidente sa international community?
Basig moabot sa ponto nga si Senador Leila De Lima ang mapasanginlan aron pag-divert sa mga headlines.
* * *
Akong gidayeg ang tinguha ni Cebu City Councilor Dave Tumulak nga patas-an na ang molta ug pagka-priso niadtong mga mag-inom ug maghubog sa mga public places sama sa gutter, daplin sa kalsada, agi-anan sa katawhan, plaza, park ug uban pang mga pampublikong lugar.
Sa level sa konsehal kutob ra gyud sa pagpasaka sa mga penalties ngadto sa P5,000 or 6 months imprisonment kay maoy nalatid sa local government code.
Ang akong gipaabot mao nga ipatuman ni Cebu City Mayor Tomas Osmeña dinhi sa siyudad ang total ban sa liquor inig dayong lawom na’ng gabii sama didto sa dakbayan sa Davao.
Ambot kung kaya ba nga himoon ni Osmeña pagka-ngan nga palahubog sab ni siya kaniadto ug dunay daghang mga amigo’ng negosyante nga nagpadagan og imnanan ug mga balay kahilayan paghatag og kalingawan panahon sa kagabhion.
Maayo lagi unta kung ang tanang palahubog pulos mga responsable nga dili maapil og kahasol ang pamilya.
Ang nakaporke man gud kay hasta ang asawa ug mga anak pukawon og tungang gabii aron sugoon pag-utang og bino sa suking tindahan.
Ang nakaporke pa gyud kay mang-hasi kung magkuwang pa ang giutang. Paeta gyud!
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
