Ngan nga usa ka daku’ng sindikato ang binuhatan sa tulo ka mga dinakpan nga mga Romanian nationals kinahanglang tun-an pag-ayo sa taga Land Bank of the Philippines (LBP) ug National Bureau of Investigation (NBI) nga ipangtaral ning mga kanahan sa mga kaso nga dili sila kapiyansa.
Dili ba puwede nga ipangkiha ning mga tonto sa kasong economic sabotage?
Si NBI Special Investigator Florante Gaoiran mitug-an sa akong interview niadtong Biyernes sa gabii nga ilang pangkasohan sa kalapasan sa Republic Act 8484 (The Access Devices Regulation Act of 1998) nga bailable offense.
Ang mga biktima sa ATM skimming scam sama nilang retired RTC judge Mienrado Paredes puwede’ng mangiha sa kasong theft nga makapiyansa gihapon ang mga dinakpan.
Kung makapiyansa ning mga tawhana mobalik na sab sa ilang illegal nga kalihukan.
Sa sinugdanan sa interrogation nilang Gaoiran ug NBI Special Investigator Arnel Pura, puwerte’ng panghimakak sa mga dinakpan, apan dihang gikonprontase sa mga ebidensiya nga nakuha sama sa skimming device ug mga cards, wa na maningog.
Konbinsido ko nga kini gyud silang grupoha maoy mga responsable sa ATM skimming scam.
Kudos sa taga NBI !
Sa akong nahibaw-an, gawas nilang retired RTC judge Paredes ug government employees, dunay laing duha ka mga RTC judges ang biktima.
Ang usa sa mga huwes nga biktima nga di lang magpa-ila mitug-an kanako nga nakuhaan siya og 50 mil pesos ug didto sa Bacolod gihimo ang unauthorized withdrawal.
Gani sumaa niya nga andam siya’ng motestigo batok sa mga dinakpan.
Sa Cebu City Prosecutor’s Office dunay duha ka mga lady prosecutors ang biktima. Ang usa nakuhaan og P100,000 samtang ang laing piskal nakuhaan og 12 mil pesos.
Sa Ombudsman Visayas, dunay tulo ka mga biktima. Ang usa kanila anak og huwes sa MTCC unya nakuhaan og 150 mil pesos.
Akong tan-aw ning sitwasyuna, tulin pa sa alas kuwatro nga mahuman ning mga kasoha ug makonbikto ning mga kanahan kay dunay mga biktima gikan sa prosecution ug sa judiciary.
* * *
Kinahanglang subayon pagtarong sa atong mga otoridad kining mga nanggawas nga mga estorya nga dunay mga kidnapping incidents dinhi sa Sugbo.
Ako nagduda nga dili gyud kidnapping ang nahitabo didto sa Minglanilla.
Niadtong Biyernes sa gabii, false alarm sab ang kidnapping didto sa Cordova Police Station.
Hinoon magpasalamat lang sab ko niining mga tawo nga nagpakabana ug nagduda dayon nga dunay mga biktima sa kidnapping kay atong na-obserbahan nga paspas na ang pagtubag sa kapolisan.
Mitagam na kita niadtong pagdagit sa bata nga si Ellah Joy Pique sa Minglanilla kinsa napalgang patay sa Barili unya hangtud karon wa pay nakonbikto.
* * *
Paeta gyud sa uban natong mga kalsada karong panahuna kay pakyas gihapon ang taga Department of Public Works and Highways (DPWH) pagpa-ayo.
Usa na diha sa may north reclamation area paingon sa dakbayan sa Mandaue.
Laing mga lugar nga puwerte’ng gusbata diha sa may Edison Street sa Barangay Lahug nga buyon sa Saint Therese Parish Church ug paingon sa Central Command.
Hangtud karon wa pa sab ayoha diha sa Barangay Apas ug ingon man diha sa may Don Gil Garcia, Sanciangko, Panganiban ug uban pa.
Asa man intawon ang atong budget sa road maintenance and repair? Ingon ani ka inutil ang taga DPWH ug ang atong mga local nga mga opisyal?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
