Sure ta? Way protector nga pulis sa illegal swertres?
Mangambot lang ko sa pasalig sa mga kadagkuan sa kapolisan dinhi sa Sugbo nga masumpo g’yud nila ang problema sa tanang matang sa illegal gambling sulud sa 15 ka adlaw pagtuman sa marching order ni PNP Chief Director General Ronald “Bato” dela Rosa.
Alang gud nako dili kini maoy daku’ng suliran nga atong giatubang. Mas bug-at ang problema sa illegal drugs.
Nasayod kita nga ang sugal panginabuhi sa uban ilabina ang masiao ug illegal swertres.
Kung way kalooy ang mga pulis kay nagtuman lang sa balaud, ang mga piskal ug mga huwes magsabot-sabot sa korte sa plea bargaining nga pasayloon nalang ang mga dinakpan or pamoltahon lang og gamay.
Gawas niini, gamay ra ang atong kapolisan unya ang nakaporke duna kunoy mga police nga protector sa operation sa mga illegal gambling.
In fairness sa mga kadagkuan sa PNP, niadtong Sabado sa hapon atol sa among programa’ng “Dialogue On The Air” sa DYSS Super Radyo mitunga ug mi-esplikar sa problema sila si Chief Inspector Janette Rafter sa Cebu Provincial Police Office (CPPO), Cebu City Police Director S/Supt. Joel Doria, Mandaue City Police Director S/Supt. Roberto Alanas, Supt. Rey Tiempo sa Lapu-Lapu City Police Office, Supt. Emerson Dante ug S/ Inspector Albert Quilitorio sa Talisay City Police.
Ilang gipasalig nga molampos g’yud sila sa kampanya ug dili nila igsapayan ang kabugnaw sa papel sa mga piskal ug mga huwes.
Wa kuno’y protector sa ilang hanay. Kung naa man ilang silotan ug relibohan ang mga hepe kung mapakyas pagsulbad. Ambot lang!
* * *
Dili ko panatiko ni Presidente Rodrigo Roa Duterte apan insakto siya nga mihulagway kang kanhi ex-president Noynoy Aquino nga usa ka dakung “buang” human namahayag si citizen Noynoy nga wa siya makabatyag sa kawsa karon sa gobyerno batok sa illegal drugs.
Nganong wa gud tawon siya makatagamtam og kaayohan sa krusada karon?
Nagpasabot na ba hinoon nga nasayod si citizen Noynoy nga wa pa g’yud makatunga pagsulbad ang Duterte administration batok sa illegal drugs kay ang ilang pagdumaa kaniadto sa nasud siya maoy unang “protector” sa lapad kaayo nga shabu distribution?
Sa sinugdanan, dili g’yud ko ganahan nga ilambigit ang kanhi ex-presidente ug iyang mga kaalyado sa Liberal Party sa illegal drug operation.
Apan kung ingon ani ang dagan sa sinultihan sa atong mga kanhi nga nagdumala butang sab kini nga angay’ng hinuktokan kung wa ba g’yud sila malambigit. Naay Senador Leila de Lima atua na nagtungkalo sa prisohan.
Nganong magpaka santos man si Aquino ug iyang mga hinanib? Sa iyang panahon nakahimo sila og single operation batok sa mga Espinosa ug mga Parojinog? Loslos ning mga tawhana!
* * *
Bisag unsa ka dautan ang mga Parojinog sa Ozamiz City nga nagpasiugda sa “Kuratong Baleleng” ug nalambigit sa illegal drugs operation, apan dinayeg sa ilang mga konstituwente.
Nakasabot kita nga nagsentimento ang mga kabanay ug mga silingan sa ilang kamatayon ni mayor Reynaldo Parojinog, iyang asawa nga si Susan, board member Octavio Parojinog ug uban pa kay puwerte man ang mga Parojinog nga motabang sa ilang problema penansiyal.
Grabe kaayo ang mga binuhatan sa Kuratong Baleleng kaniadto. Manulis sa mga bangko, gun-for-hire, mangolekta og illegal nga buhis sa mga magtukod og negosyo didto sa Mindanao.
Pag-uso sa shabu, sila sab ang dakung distributor sa Mindanao. Kaniadto pa misubang ang pangalan sa mga Parojinog sa tibuuk Pilipinas.
Ang dakung insulto kay nakalingkod pa og dagkung puwesto sa gobyerno.
Wa ba kaha mangayo og campaign funds sa mga Parojinog ang previous administration? Nganong wa may naka-ako pagtandog kaniadto?
Mao raba g’yud ni ang nakamaot sa pulitika sa nasud kay ang nagdumala maikog na pagtay-og bisan illegal ang gisudlan nga negosyo sa mga padrino kay nakautang og kabubut-on.
Maglaum ko niining pamunuan ni Duterte nga wa siyay santoson.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
