Lousy nga paagi sa PNP

SUAREZ

Ako mismo biktima sa lousy nga paagi karon sa kapolisan nga did-an na kami’ng mga sakop sa media nga maka-access sa spot report ug police blotter.

Tabla ra nga ning paagiha dili g’yud mohatag og detalye ang PNP sa mga panghitabo.

Akong na-experienced kining sestemaha dihang gipusil didto sa Talamban niadtong Miyerkules sa gabii si Tuburan Municipal Councilor, Atty. Renante Dela Cerna.

Dihang na-busy mi’g follow up atol sa akong radio program, wa gyu’y taga Talamban police ang mihatag sa insaktong detalye. Gani wa g’yud mikompirmar nga abogado ang biktima.

Suwerte lang ko kay dunay usa ka respetadong opisyal sa gobyerno nga nag-monitor ug mi-text kanako sa detalye ug sa pangalan sa biktima.

Hangtud among nakontak ang igsoon sa biktima ug mikompirmar sa hitabo ug mikompleto sa pagyagyag sa detalye.

Kung magpadayon ni’ng paagiha sa kapolisan moabot ra g’yud sa ponto nga lain-lain ang dagan sa estorya sa mga balita.

Posible pa nga moabot sa ponto nga ang biktima mao nay suspetsado.

Wa g’yud ko kasabot nganong ihikaw sa kapolisan ngadto sa publiko ang mga krimen nga nahitabo nga unta motuman man kami’ng mga tigbalita sa mga off-the record nga detalye sa tumong nga dili maapektahan ang ilang follow-up operation.

Niadtong Sabado atol sa among radio program nga “Dialogue On The Air” sa dySS Super Radyo mipasabot si Supt. Artemio Ricabo, deputy director for administration sa Cebu City Police Office, ug iyang mga kaubanan sa PNP nga puwede’ng maka-lili sa police blotter ang mga tigbalita apan bawal na nga ipabasa sa ilang police personnel ang blotter aron ibalita ug i-on the air.

Buot ipasabot nga ipa-adto g’yud personal sa mga sakop sa media ang crime scene ug ang ilang police station.

Pagkadaku gyu’ng binuang niining paagiha kay dili tanan ma-cover sa mga tigbalita ilabina ang mga lagyo’ng lugar kay nag-cost cutting ang mga media organizations.

Dili ba puwede nga mag-designate sila og public information officer matag police station aron maoy tahasan sa trabaho ug maoy manubag sa prensa?

* * *

Unsa ka tinuud nga adto na idestino sa Masbate Provincial Prosecutor’s Office si controversial prosecutor Mary Ann Castro?

Niadtong Biyernes akong mga news sources miingon nga dunay memorandum nga pirmado mismo ni DOJ Secretary Vitaliano Aguirre II ang pagpabalhin kang Castro sa Masbate.

Ambot kung si Castro ba maoy gusto nga magpa-assign didto o ba kaha kagustohan ni Aguirre aron ilikay si Castro sa mga kontrobersiya.

Una nakong nahibaw-an si Castro mo-resign nalang sa katungdanan kay dili na siya malipayon sa iyang trabaho human gipahamtangan sa sunod-sunod nga suspension.

Apan dihang nakabalik sa serbisyo, wa na siya hatagi ug mga court assignments. Wa na sab ko kakita niya nga mi-handle og inquest investigation sa mga dinakpan.

Ang rason ni city prosecutor Liceria Rabillas nga wa niya hatagi’g court duty si Castro kay matud pa dunay mga huwes nga nangreklamo.

Wa sab modetalye si Rabillas kung kinsay nang-reklamo ug unsang matang sa mga reklamo.

Di ba kaha panimawos lang kang Rabillas ngadto’ng Castro kay puwerte’ng away nila kaniadtu.

Daku’ng epekto ni Castro kung adto na siya sa Masbate kay medyo distansiya sa Sugbo ang maong lugar samtang ang iyang pinuy-anan anaa diha sa dakbayan sa Talisay unya maapiki siya sa panahon sa paggukod sa mga property sa anak ni late vice-governor Greg Sanchez nga si Greeco nga iyang naminyoan sa usa ka Muslim rites.

Segurado ko nga mangayo’g reconsideration si Castro niini ngadto kang Aguirre ingkaso nga dili g’yud siya kampante didto sa Masbate.