Politika ug garbo maoy babag ni Rama

Nakaabot pa gyud ko sa gipatawag ni Cebu City Mayor Michael Rama nga “Interactive Forum with Media Leaders” kagahapon sa buntag diha sa Social Hall, Legislative Building sa Cebu City Hall. Kadto maoy una nakong pagtambong sa tinuig nga kalihokan sukad gihimo kini sa Rama administration. Pipila sa mga isyu nga gipasupot ug gitubag sa mayor mao ang kontrobersiyal nga disposal sa South Road Properties (SRP) kay pwerteng babag sa iyang kontra nga si kanhi kongresista ug kanhi mayor Tomas Osmeña ug sa mga hinanib niini diha sa konseho nga mga sakop sa Bando Osmeña – Pundok Kauswagan (BO-PK). Politika ra gyuy hinungdan niining tanan ug ang garbo human nangaparot. Wa na lang gyud hunahunaa sa taga-BO-PK ang kaayohan sa kinabag-an. Sayang ang mga maayong panlantaw ni Rama alang sa dakbayan sa Sugbo sama sa pagsulbad sa drainage problem, traffic ug uban pa. Mahug siyang inutil sa iyang mga plano kay way kwarta tungod kay way mahitabong baligya sa SRP. Usa sa gipanghimug-atan ni Mayor Rama kagahapon nga buot niyang ipabalik kadtong “Freedom Park” diha sa Carbon nga maoy kanhi abtanan sa mga karaang tiglantugi sa mga isyu kaniadto ug debate sa rehiliyon. Mao nga misagbat na lang sab ko nga puslan man atong balikon ang “Freedom Park” agig lakbit-saysay sa kanhiay mao nga akong gisugyot sa mayor nga ibalik ang karaan nga kahimtang diha sa Colon area niadtong mga dekada 70 ug 80 diin magsakay og tartanilya ang mga tawo kaniadto ug lamparahan ang gigamit nga sugang dagitabnon ug dunay mga baligya kaniadto nga mga tuba ug mga native products. Gituyo ko kadto pagsugyot agig paghatag og dakung importansiya sa mga senior citizens ning dakbayan kay pinaagi sa pagbanhaw niining tanan, diha sa Colon ikalipay kaayo nila ug sayon kaayo silang makahanduraw sa kagahapon nga nahimong tipik sa kasaysayan sa atong pagkamalamboon karon. Si Sir Bobit Avila sa The Freeman nga akong giduol human sa programa iyang nakita nga di sab gyud maayo nga i-ban ang mga sakyanan diha sa Colon kay alkanse ang mga negosyante. Akong nasabtan kaniya nga kun i-ban man ang mga sakyanan, mas maayong manglakaw na lang ang mga tawo diha sa Colon kay kun tugtan nga makasulod ang mga tartanilya, makig-kompetensiya usab ang mga trisikad drivers. May punto si Sir Bobit kanhi chief sa City Traffic Operations Management (Citom). Alang nako, kun kaya sa uban nga manglakaw, wa gyuy problema. Ang importante nga kun manglakaw ta dihang dapita, mga paradista ray makadasmag natong mahubog sa tuba ug gamay rag danyos. Hehehe. Sa tinuod, lang nawala na gyud ang kanindot sa Colon karon. Karon kapakot na lang ang mga baligya sa adlawan ug inig sayong gabii. Pero inig abot sa mga pasado alas-9 sa gabii, kuyawan na ta nga maglakwatsa sa Colon kay medyo ngiob na ang mga palibot. * * * Akong gipahimuslan ang panahon kagahapon pagpaabot kang Cebu City Mayor Michael Rama ang problema sa mga court personnel nga way sakyanan ug magsalig pag-commute sa PUJ paingon unya sa Quimonda Building diha sa North Reclamation Area nga maoy ilang balhinan. Dali niyang gimandoan si Citom Executive Officer Jonathan “Joy” Tumulak nga sulbaron ang maong problema. Samtang maglisud ang City Hall pagbutang didto og skywalk nga maoy agian sa mga trabahante nga tag-as na og mga edad alang sa sayon nga paglabang sa tulo ka mga lagpad nga kalsada, andam ipagamit sa Syudad ang duha ka mga Yokohama Buses. Si Joy Tumulak mipasabot nga sa ilang pagtuon lisud gyud kaayo nga magbutang og rota sa jeep didto sa Quimonda. Ambot lang kun makasulbad ba gyud kini kay dili ra baya mga trabahante sa korte ang moadto didto, lakip na usab ang mga tawo nga motestigo sa korte ug ubang mga litigants. Akong nahibaw-an kang 2nd Vice Executive Regional Trial Court (RTC) Judge Ramon Daomilas nga unom silang mga huwes uban sa mga court staff nga magsugod na pagbista didto sa Quimonda building. * * * Maglaum ko nga duna pay daghang foreigner ang madakpan nga mihimo og cyberpornography dinhi sa dakbayan sa Sugbo sama niadtong babaye nga Chinese national nga si Mei Ti nga nakasohan na kagahapon sa korte. Nagtuo ko nga dili lang si Ti maoy nag-operate og susamang dating-on-line ug mail-order-bride. Dili kaha sumpay sa sindikato kadtong mga pictures nga nakuptan sa akong news source nga dunay mga Filipina nga gihimong sex slaves? * * * Wa gyud mo-angkon sa kasong pagpusil-patay ngadto sa usa ka magsisibya sa RMN bisan gikonbikto na kagahapon ni RTC Judge Sylvia Paderanga kadtong government employee sa Aklan province nga si Amador Raz. Si Raz nga akong na-interview, nagkanayon nga inosente gyud siya pagpatay kang Rolando Ureta, announcer sa Aklan niadtog Enero 3 sa tuig 2001 pagka-gabii sa barangay Baro, lungsod sa Lezo. Matud niya nga nabayran lang gyud ang mga testigo nga nagtumbok kaniya nga siya maoy trigger man. Alang niya, nga dawaton na lang niya ang sentensiya ug Ginoo na lay bahala sa mga tawo nga nagtumo-tumo. Usa kining kasoha nga gibalhin dinhi sa Sugbo human matud pa gihulgang patyon ang mga saksi. Ang kauban niya sa krimen nga giingong usa ka merchandiser nga si Jessie Ticar dugay nang namatay sa sakit. Pero ang nakapait kay wa pa gyud matumbok kun kinsay utok sa krimen.