Samtang ga tambay mi sa usa ka boardinghouse nga daghang gwapa ang usa namong kauban nag pakli-pakli og Time Magazine. Ug kalit siyang miingon og –“murag familiar man ning nawnga, murag kita na ko ani niya sa TV, murag kadaghan nako kita aning iyang hitsura.”
Gitan-aw namo kon kinsa kining celebrity nga iyang gipasabot. Nakatawa kami kay ang iyang gitudlo mao man ang gamay nga picture ni Hitler.
Si Karl Marx, Albert Einstein, Mao Zee Dong, John Lennon, Che Guevara, Bob Marley, Marilyn Monroe, Andy Warhol, Mahatma Gandhi, Charlie Chaplin ug ang dila ni Mick Jagger maoy mga classmate ni Adolf Hitler sa silk screen icons room. Apan murag dunay special class si Hitler kay daw matipon man ang iyang hulagway sa marka demonyo, marka kalabera, cross, swastika (nga usa usab ka klase sa cross), do not enter ug sa stop sign.
Tungod sa mga asoy sa iyang kamangtas may dalang kulba o kahadlok ang hulagway ni Hitler. Tungod sa minilyon ka mga Hudiyo nga iyang gipang ihaw sa Holocaust, nahimong ngilngig ug ngil-ad ang iyang hulaway.
“Surely, there must have been some good in Hitler’s life that can be lifted,” matud pas akong higalang magbabalak nga si Sawi Fox Aquino. “I’m sure he was cute as baby Adolf and made those around him smile,” sumpay pa ni Sawi.
Well, siya maoy nangusog nga mahimo ang Volkswagen (people’s car matud pa niya) ug ang jet (nga maoy katapusan niyang baraha sa World War II).
Baby Adolf grew into an awkward teen, usa ka frustrated painter nga siging gibugalbugalan ug nga walay art school ng modawat. Nahimo siyang homeless nomad niadtong panahon sa Germany diin haruhay ang mga Hudiyo og purdoy ug unemployed mga Aliman nga local. Para mabuhi naghimo siyag watercolor postcards nga binaligya sa iyang higala.
Misulod siya sa military, nasamdan sa gubat ug nakadawat og medal. Isip “hero” sa gubat gipasulti siya og dinhi namatikdan ang iyang abilidad sa diskurso. Pinaagi sa iyang pagdiskurso, nahimo siyang politico nga nahimong pangulo sa iyang nasud. Dihang pangulo na siya, iyang gisugdan ang lakang pagpadaku sa Germany pinaagi sa pagpangagaw sa ubang nasud. (Dinhi miulbo ang World War II ug dinhi gasugod ang pag panakup sa mga Hudiyo nga gipangbalhug ni Hitler sa gas chambers.)
Kining pagpangaw og luna ni Hitler maoy gitandi ni P-Noy sa gihimo karon sa China sa West Philippine Sea.
Niulbo ang kaspa sa mga Insik dihang gitandi ni P-Noy ang ilang mga leader kang Hitler. Gitawag si P-Noy sa state media sa China nga usa kay way alamag ug amateur nga politico tungod ning iyang allusion kang Hitler sa China sa usa ka interview sa New York Times.
Nianing tungora mibalik sa akong hunahuna kining gabalik-balik nga hinanggaw nga si Hitler anak ni Rizal.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
