Haskang paeta sa ubang mga empleyado sa korte kay miapil na sa pagbaligya’g shabu.
Inay unta motabang pagtul-id sa mga tawo apan maoy nagniyabag.
Niadtong June 3, gidakop ang kawani didto sa lungsod sa San Fernando duol sa Evangelical chapel.
Ang nasikop atol sa buy bust operation mao si Clint Barayoga Baricuatro didto sa boundary sa South Poblacion ug North Poblacion.
Nag-atubang na siyag kasong kalapasan sa Section 5 ug Section 11, Article 2 RA 9165 diha sa Qimonda human na-inquest sa Provincial Prosecutor’s
Office.
Pagka wa gyu’y ayo ani kay ultimong alagad sa husgado mi enter na.
Ang pangutana ron, kung siya ra ba? Asa man siyag shabu? Dili kaha ni ebedensiya sa korte unya siya maoy gipabaligya?
Posible ba kaha nga ang uban niyang customer iya ra’ng mga kauban sa korte?
Maayo tingali nga mang-inbentaryo atong mga huwes sa ilang mga ebedensiya ug ipatuman ang mandatory drug testing sa mga court personnel.
Maayo sab tingali nga i-monitor ilang mga kawani kay basig mga drug lord na.
* * *
Wa pa gyud mahurot ning mga scalawags sa Land Transportation Office (LTO-7).
Nahibaw-an sa imbestigasyon sa NBI-7 nga kadtong gidakop sa entrapment operation sa Lilo-an nga si Alecan Caya Abadines nga mo-process og mga fake driver’s license ug fake nga official receipts dunay kakonsabo nga taga LTO.
Si OIC Provincial Prosecutor Jose Edwin Renegado gitug-anan sa mga opisyales sa NBI nga ang machine nga gigamit sa pag-imprinta ug ang mga papel gikan gyud sa LTO-7.
Nagpasabot nga duna gyu’y personnel diha sa LTO nga kakonsabo sa tinunto ug posible nga mao pay mastermind sa kabuang.
Daku kining hagit ni Regional Director Victor Caindec kung unsaon niya pag-limpiyo ang iyang buhatan sa mga scalawags.
In fairness ni Director Caindec siya maoy nihangyo sa NBI nga ipa-entrap si Abadines.
* * *
Nakasakmit niadtong Biyernes sa hapon ang mga tinugyanan sa National Bureau of Investigation (NBI-7) og mga fake Viagra sa duha ka mga tindahan og mga beauty products sa Lapu-Lapu ug Mandaue.
Ang mga operatiba, pinangulohan ni NBI Senior Agent Florante Gaoiran, milampos kay may dala silang search warrant nga giisyu ni RTC Judge Ramon Daomilas.
Pero ang nakaporke kay way tag-iya nga nasikop kay mga sales lady ra ang naaktohan.
Subayon pa sa NBI kung kinsay tag-iya ug asa gipang-display ang ubang stocks.
Kuyaw ra ba kaayo ang packaging sa fake Viagra kay duna gyu’y picture nga maka-ingganyo niadtong huyang na sa kumbate sa kama.
* * *
Daghan ang intresado nga mangaplay sa pagka Cebu Provincial Prosecutor human mi-retire si Provincial Prosecutor Pepita Jane Petralba.
Pipila sa akong nahibaw-an nga intresado mao sila si Talisay City Prosecutor Marcial Rubia, Prosecutor Mary Ann Castro ug Atty. Gerry Mapula nga atua nagbase sa Masbate.
Karong bag-o ang mga personnel sa Provincial Fiscal mopirma og manifesto aron hangyoon si Acting Provincial Prosecutor Jose Edwin Renegado nga mo-apply kay mas kampante sila nga insider lang ang ma appoint.
In fairness hinoon kang piskal Renegado maoy most senior, makamao sab sa trabaho, maayo og performance unya wa sab ko makadungog nga nagtinunto sa trabaho.
Apan kung way political backer sa Malacañang ang usa ka aplikante maglisud gyud kay naanad na kita sa padrino system kay ang presidente nga usa ka political animal maoy makatudlo sa iyang ibutang sa puwesto.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
