Farewell ug maayong pagpanaw Earl

By: Lloyd Suarez July 29,2018 - 08:55 PM

Ngan nga among nakauban sa taas nga panahon si late PDEA Deputy Director for Operations Earl Rallos daghan kaayong mga butang nga di gyud nako makalimtan kaniya.

Niadtong May 1993 nga maoy pagsugod nako sa broadcast industry sa DYMF Bombo Radyo Cebu akong nahibaw-an nga si Bombo Earl connected na sa Bombo Radyo Cagayan.

Wa magdugay dihang mi-take over isip bag-ong station manager si Bombo Mon Chavez (Dan Vicente) nga gikan sab sa Cagayan, si Earl nabalhin dinhi sa Bombo Radyo Cebu kay ka bro sila sa fraternity.

Una siyang gibutang sa newsroom department dihang nagkuwang na og mga personnel.

Apan dihang among gi-strengthen ang news, commentary, public affairs and investigative department gibalhin siya sa among departamento.

Mao nga niadtong mga panahona sadya kaayo ang among departamento ug productive gyud kaayo. Anaa ang pagtinabangay ug pag-inonongay sa kasakit ug kalipay.

Misamot ang among kasud ni Bombo/Super Earl niadtong February 1997 dihang gikuha mi ni Sir Bobby Nalzaro isip mga pioneering nga maoy maglangklub sa news and public affairs sa gipalig-on ug gipakusgan nga DYSS Super Radyo, GMA-7 Cebu.

Daw managsoon gyud ang among pag-tratar sa usag-usa kaniadto.

Usa sa mga butang nga di gyud nako malimtan ni Super Earl mao nga molikay gyud og away unya ang iyang mga adjective nako kaniadto hinganlan ko niya og “inter-galactic prosecutor”, “tawong way kurat” ug “komentarista nga nagdalag mga bangkaw.” Siaw gyud kaayo to siya ilabina mag-quorum mi’g tagay.

Bisan niadtong panahon sa nightly program ni Sir Bobby nga siya maoy maka handle moingon gyud dayon to siya sa dayong tapos or extro nga “Atangi ninyo si Super Lloyd Suarez sa iyang mga komentaryo nga nagdalag mga bangkaw”. Sipat ug komedyante gyud kaayo unya maayo kaayo modala’g barkada.

Dihang nabalhin na siya sa Philippine Drug Enforcement Agency (PDEA) niadtong mga 2006 or 2007, talagsa na kaayo mi’ng magkakita niya kay pulos busy sa trabaho.

Niadtong October 2017, mibangka pa siya namo’g mga mainom sa kanhi Pino restaurant sa Lahug atol sa among reunion sa Bombo Radyo Academy.

Ang pinaka-latest namong kita, niadtong sayo ning tuiga atol sa akong programa’ng “Dialogue On The Air“ sa DYSS Super Radyo diin usa siya sa mga guests nga nag-representar sa PDEA-7 sa topic nga gihisgutan nga parte gihapon sa kampanya batok sa illegal drugs.

Mao nga na-shocked gyud ko dihang gitawgan ko ni Super Jeffrey Tumulak niadtong Biyernes sa hapon nga si Earl maoy biktima sa pag-ambush patay diha sa may Villalon Drive kilid sa Baex Building Capitol.

Sama sa mga sakop sa pamilya, kaming mga kanhi kauban ni Earl nanawagan sab ug hustisya ug katin-awan sa motibo sa krimen.

Bahin sa nakuhang shabu sa iyang sakyanan, si Earl ray makadetalye unta.

Apan patay naman siya, Ginoo ray nasayod sa tanan.

Rest in peace Super Earl. Salamat sa atong panag-uban ug mga pahasubo ngadto sa tibuuk pamilya ilabina kang Inday iyang asawa ug sa upat ka mga anak.

Maglaum ko nga kining kamatayon ni Earl dili makapabahag sa ikog sa taga PDEA ug ubang mga law enforcement agency pagpakiggubat sa illegal nga drugas nga puwerte kaayong nakadaot sa atong komunidad.

Subscribe to our regional newsletter

By providing an email address. I agree to the Terms of Use and acknowledge that I have read the Privacy Policy.
Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: Earl, farewell, maayong, pagpanaw

Subscribe to our regional newsletter

By providing an email address. I agree to the Terms of Use and
acknowledge that I have read the Privacy Policy.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.