Nag mea culpa si kanhi Mayor Val

SUAREZ

Mas maayo pa si kanhi Naga City Mayor Val Chiong kay miangkon ug nangayog pasaylo nga duna siya’y sayop sa nahitabong landslide nga mikalas og daghang kinabuhi ikomparar sa taga Mines and Geosciences Bureau sa DENR-7 nga daghang liko-liko ug pasakalye sa trahedya.

Niadtong Sabado sa hapon nga didto mi sa Naga City Hall nagsibya sa akong programang “Dialogue On The Air” sa DYSS Super Radyo akong gihangyo si kanhi Mayor Val nga mo-participate sa programa ug didto siya nakapadayag nga kung duna man siya’y sayop sa nahitabo mao ra gyud ang iyang pagka pulitiko.

Iyang gipasabot nga niadto pa’ng tuig 2009 iyang nahangyo ang management sa APO Land Quarry Corp. or APOCEMEX nga dili ipatuman ang demolition order batok sa mga residente sa may Sitio Sindulan Tinaan nga didto ang daghang patay ngan nga iyang mga botante.

Iyang giklaro nga ang tuyo sa demolition mao ang pagtuman sa pangangkon sa taga APO nga ila ang yuta ug dili tungod kay peligro nga puy-an.

Ang kanhi mayor miklaro sab nga wa siya kadawat sa findings ma-written o verbal gikan sa MGB-DENR-7 nga critical nga puy-an ang maong dapit sukad sa 2007 ug panahon sa iyang termino.

Mipalig-on kini sa alegasyon sa mga nagpuyo sa Sindulan nga giingnan sila sa taga MGB-DENR-7 nga dili peligro kadtong mga cracks sa Sitio Tagaytay ug bisan maabtan pag 20 ka tuig dili gyud matun-as ang bukid.

Gibarugan sab ni Mayor Kristine nga wa gyu’y pahibawo ang taga MGB nga mirekomendar kini og force evacuation sa mga nagpuyo niadtong Setyembre 18 o duha ka adlaw sa wa pa ang landslide sukwahi sa gipasi-atab sa maong ahensiya nga ilang na-ingnan ang City of Naga atol sa ilang exit conference.

Nanghimakak sab ang mga Chiong sa pasangil nga nakabenipisyo ilang pamilya sa APOCEMEX pinaagi kuno sa pagpadagan og security agency diin may mga guwardiya ang mga Chiong nga gibutang sa compound sa APO.

Si Mayor Chiong mipasabot nga wa silay security agency.

Pero sa akong kabahin konbinsido ko nga dunay mga butang nga nakatabang kaayo ang taga APOCEMEX sa mga Chiong ug sa ilang partido panahon sa mga nangaging eleksiyon.

Dili lang seguro ang aspeto sa pulitika lakip na ang mga ayuda sa taga APOCEMEX sa mga kalihukan sa Siudad.

Pero sa nahitabo migitib pag-ayo ang pagka-incompetent sa taga MGB-DENR-7.

Abir kining parte sa rehabilitation sa mga bukid nga gipang-quarry ug gipang-mina sa tibuuk nasud, unsang matang sa rehabilitation nga gustong ipatuman sa taga DENR?

Unsa man? Bulitan o tapakan og semento o ba kaha puthaw ang mga bangag o tunnel aron mapulido og balik ang mga bukid?

Kung tamnan lang og mga puno-an sa kahoy, makopya ang nahitabo sa Itugon Benguet.

Sa monitoring sa taga MBG, makaya nilag libot ang quarry site nga lisud ang terrain? Naa silay helicopter aron epektibo ilang monitoring?

* * *

Nabalaka sab ko sa location sa Naga City Jail ug ang tupad nga Naalad cemetery kay anaa sila sa ubos sa gipahakan nga taas ug dakung bungtod.

Hinoon wa may nangliki nga parte sa bungtod nga itip kaayo apan simbako kung maigo sa buhawe ug kusog nga linog, mamiligro gyud ang mga piniriso.

Bisan ang hepe sa Provincial Disaster Risk Reduction and Management Council (PDRRMC) nga si Baltazar Tribunalo nga akong gipahibawo miingon nga mas maayong putlan ang bungtod.

Si Mayor Chiong nga akong gipahibawo mipasabot nga posibleng ilang himoan kini og aksiyon paglikay sa laing disgrasya.