outbrain

Maglikay unta sa kontrobersiya si Gov. Jun

By: Lloyd Suarez October 28,2018 - 08:42 PM

SUAREZ

Taliwa sa mga pagduda, ipadayon gyud sa administrasyon ni Governor Junjun Davide ang pagpa-construct sa 20 ka andana nga building nga maoy ipuli sa gipaguba nga BAEX building diha sa Capitol Compound.

Si Provincial Engineer Hector Jamora miingon nga karong Nobyembre 9 mao na ang public bidding sa maong proyekto ug gani duna nay upat ka mga intresadong bidders.

Duha ka local bidders unya duha sab ka national. Posible nga mapun-an pa ang mga bidders.

Gipasabot ni Jamora nga dili na gyud kapugngan ang maong proyekto ug makaya pa nga masugdan bisan duol na ang eleksiyon.

With all due respect, maayo gyud unta nga maglikay si Gov. Junjun kay dili kalikayan ang mga pagduda nga gamiton kining maong proyektoha sa pamulitika.

Unsa may gidali-an nga daghan pa man tag kapasilongan?

* * *
Kabanay niadtong usa sa duha nga gipangsalvage didto sa Sitio Cambaye, Barangay Campo 8 dakbayan sa Toledo niadtong miaging simana midangop kanako aron mangayo og hustisya.

Gipasabot sa pamilya nga dili gyud carnapper si Abelardo Salumag kinsa kauban nga napatay kang Jonel Abatayo pulos mga residente sa Siudad sa Talisay.

Matud pa, si Salumag usa lang ka mekaniko og motor sukwahi sa pasangil sa kapolisan nga sakop sa carnapping group ug maoy matud pa tig chop chop or tig pisa-pisa sa mga motor nga kinarnap.

Mga sakop sa pamilyang Salumag nagkanayon nga nataymingan lang gyud nga si Abelardo mi-ayo og motor nga kinarnap.

Gitoho-an sa mga miembro sa pamilya nga pulis ra ang misalvage nilang Abelardo ug Jonel dihang ang giingong biktima sa carnapping sa Lapu-Lapu nagmakuli sa pagpadayon sa pagpasakag kaso.

Bisan ang inahan ni Jonel nga si Evelyn nagtinguha nga modangop sab sa Commission on Human Rights (CHR-7).

Ang nakalisod lang sab nga wa pa gyu’y makatumbok kung kinsang mga pulisa ang mi pick-up sa duha ug maoy mipatay.

* * *
Kanus-a man tawon makabalik og puyo ang ubang mga pamilya sa Sitio Sindulan, Tinaan, Naga nga duol sa ground zero nga wa mabutang sa peligro?

Alang lagi nako kadtong mga panimay nga anaa nahimutang sa labang sa kalsada puwede pa gyud to puy-an pagbalik.

Ang mga tag-iya nga anaa pa sa mga evacuation centers gusto na gyud kaayong mamalik pagpuyo kay gipangkapoy ug wa silay privacy sa mga evacuation centers.

Apan tungod lagi niining kalangayan sa taga DENR pagpahigayon og final geotagging maoy nagdalag tigaw sa ilang pagpuyo.

Kumusta man tuod ang sitwasyon sa ground zero niining nagkaduol na nga Kalag-Kalag?

Tinuud ba gyud nga dunay mga katingalahan nga panghitabo hangtud karon?

Kulba ning mga estorya nga atong madunggan nga dunay mga panon sa iro nga magsigeg usig bisag way tawo sa palibot ug dunay laing panon sa mga iro nga gibiyaan sa ilang mga amo nga magsigeg uwang bisag adlawan.

Hinoon sa panultihon sa atong mga katiguwangan kinahanglang atimanon ug pahinungdan ang atong mga kalag kay anaa ra gyud ni sila.

Ambot kung tinuud ba gyud ning mga kaba-kaba nga mobatog sa parte sa atong panimay nga nagpasabot nga giduaw na kita sa atong mga minahal sa kinabuhi nga nag-una nato sa laing kalibutan kay wa ta na ka bisita nila sa sementeryo.

Busa mangalag-kalag gyud ta.

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.