Pag-unay sa mga lalaki maoy number 1 sa HIV/AIDS

SUAREZ

Si Dr. Rene Joseph Bullecer, presidente sa AIDS Free Philippines mibutyag karong bag-o nga misaka gyud og 94 porsiento ang male to male sex nga maoy hinungdan pag-angkon sa sakit nga HIV / AIDS.

Miingon sab siya nga sa 15 mil nga gibanang-banang gidaghanon sa mga bayot, 5 percent niini or 750 ang positibo sa matang nga sakit.

Sa tibuuk Central Visayas, ang Siudad sa Sugbo gihapon maoy top 1 samtang ang Metro Cebu area maoy number 3 sa tibuuk Pilipinas.

Gipasabot sab ni Dr. Bullecer nga sagad nataptan mga lalaki kay sa iyang clinic way babaye nga pasyente.

Ang sulbad niini sumaa ni Dr. Bullecer undangon ang risgo nga mga binuhatan unya balik ta sa Ginoo.

* * *

Wa koy pagsupak niining pagpangbutang og mga signage o notice nga “no parking” sa taga Cebu City Traffic Office (CCTO) – CITOM sa lain-laing mga lugar dinhi sa dakbayan sa Sugbo.

Pero ang nakaporke lang kay dunay mga lugar nga dili na gyud kinahanglang butangan kay naka-obstruct sa agi-anan sa pedestrian ug sa mga motorista.

Sama pananglit sa Lahug area ilabina duol sa Saint Therese Parish Church nga anaa gipabarug ug gi-fixed gyud kay gipalubngan og tubo nga anaa nila gibutang sa agi-anan sa entrance/exit sa two level parking sa Simbahan.

Daghan na gyuy’ng manimbahay ang nadumbol sa poste sa notice kay nakapa-apike sa lugar.

Diha sab sa gawas sa Gothong compound sa Lahug ug sa mga sikbit nga kalsada gipalibutan sab og mga signage nga nakapa-apiki og samot sa kalsadang gamay.

Maglaum ko nga pang-ibton intawon ni nila ni CCTO Chief Francisco Ouano.

Dili pa na igo ang ilang pag-sigeg operation sa pagpang-clamp ug pagpang tow sa mga sakyanan nga naka illegal park?

* * *

Risgo na gyud kaayong puy-an ang Sitio Tigib Lagtang Talisay taliwa sa gihimong benching ug ubang engineering intervention sa taga QM Builders.

Nanimbawot akong mga balahibo pagbisita nako personal sa lugar niadtong Martes sa buntag kay mismo ang mga tubo nga gihimong barrier sa ilang karsada nga agi-anan sa mga dagku’ng dump truck nangatagak sa pangpang ug nangahiwi.

Unya klaro pa kaayo ang pagpangliki sa lugar nga gi-quarry.

Akoy nabalaka sa ubang mga residente didto kilid sa sapa kay nagpabilin didtong namuyo.

Ang ilang gila-uman nga maundang na unta ang quarry operation sa lugar paglikay sa landslide.

* * *

Nahurot gyud akong bilib kang Sir Chester Cokaliong, Founder and Chief Executive Officer sa Cokaliong Shipping Lines nga wa gyu’y undang sa pag-suporta namong mga sakop sa media sa Sugbo sa natad sa sports.

Salamat gyud kaayo Sir Ches sa imong pagtabang sa among mga liga sa Newsmen Basketball Association of Cebu (NBAC).

Daku sab namong pasalamat sa management diha sa Cebu Eastern College (CEC) ilabina nila ni Sir Jefferson Go, Executive Board ug kang Sir John Maraat, Sports Coordinator ug Property Custodian sa CEC tungod sa ilang pagpagamit sa ilang gym isip venue sa among mga duwa.

Magpasalamat sab ko og daku kang Sir Robert “Bobby” Inoferio nga maoy among Commissioner kinsa maoy naghan-ay sa among liga.

Maglaum ko nga magpadayon kining among mga sports activities taliwa sa mga hagit nga giatubang kay daku kining tabang alang sa himsug nga pagpangalagad.