SUAREZ
Wa ko kasabot rong bag-o ni Cebu City Prosecutor Liceria Lofranco Rabillas kung nganong dili sila mo-inhibit sa kasong libel nga gipasaka ni Miguel Osmeña batok kang Super Bobby Nalzaro.
Kaniadto mi-inhibit sila sa gipasakang libel ni Mayor Tomas Osmeña papa ni Miguel batok kang Super Bob.
Bisan na kung moingon sila nga si Miguel dili connected sa Cebu City government apan anaa ang impluwensiya niini kay ang amahan maoy nagtungkalo diha sa balay lungsod.
* * *
Haskang paeta na gyud ron sa epekto niining mga law-ay nga salida ug mga porno sites kay mga bata’ng lalaki kamao na mo-gang rape sa ilang kaduwa ug mga classmates.
Akoy nalooy sa negatibong epekto sa usa ka 12 anyos nga batang babaye nga gitabangan paglogos sa iyang mga classmates didto sa San Remegio karong bag-o.
Epekto kini sa atong ka high tech karon ilabina nga halos tanang tawo pirmi na’ng mag-atubang sa mga gadgets nga maka-access sa mga bastos.
Bisan mga batang gagmay gipaduwa na’g mga cellular phone bisan dili pa gyud unta angayan sa ilang edad.
Makapanglingo-lingo nalang ko niadtong migawas nga survey nga ang Pilipinas maoy number 1 nga nasud nga taas kaayog oras igahin pagbisita sa mga porn sites.
Unsa may intervention niini sa gobyerno ug sa nagkadaiyang mga pundok nga mihimog kawsa sa kababainhan ug kabataan?
* * *
Wa gyud ko mobilib ni Cebu City Mayor Tomas Osmeña nga mihimo’g “on the spot amnesty” o mipasaylo niadtong mga tag-iyag motor nga mi-counter flow sugod niadtong Disyembre 13.
Hinambog ning maong lakang ug nagpaka-aron ingnon nga pro-poor dihang mipagawas ang Korte Suprema og ruling nga illegal ug ipadakop ang mga Angcas ug habal-habal.
Pinaskohan ni o pamolitika kay dunay mga nadakpan nga ilang kapartido sa Bando Osmeña Pundok Kauswagan (BOPK)?
Kining atong batasan nga atras abante pag-implementar dili gyud ni maka-uswag sa atong pagpuyo.
Bisan kining off and on pagdakop niining mga motor nga pasagad og parking sa kadalanan usa kini sa mga hinungdan nga mawala ang desiplina sa uban.
Tan-awa ra kung unsa ka tulibagbag ning paagiha ni Osmeña nga muna-munag dakop ang mga traffic enforcers sa mga mi-counter flow apan takulahaw lang nga iyang gipasaylo. Unsang klase?
* * *
Nabalaka gyud ko rong mga panahuna ning nagsingabot nga Pasko ilabina sa mga lugar nga hugopan sa bagang duot sa katawhan kay simbakog dunay mga terorista nga mangatake, puwerteng daghanang patay.
Daku kining hagit sa atong mga otoridad nga dili molampos ang mga terorista.
Hinoon pagkakaron giklaro sa atong mga otoridad nga wa silay nadawat nga intelligence report nga dunay mga terorista nga naglihok dinhi sa Sugbo ug sa tibuuk Central Visayas.
Maglaum ko nga dili inutil ang atong mga otoridad sa ilang intelligence network.
Manghinaut ko nga dunay insaktong gidaghanon sa atong kapolisan nga mo-secure sa atong mga simbahan samtang magpadayon ang mga Misa de Gallo sa matag parokya.
Unya anaa pirme ang ilang presensiya sa kadalanan ug dili magtugtug sa pansitan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
