Way lami ang fiesta sa Sinulog kung way party!

Maayong Pasko  kanatong tanan! Sa dili pa ko  maghisgot sa Sinulog 2020 ug  ubang isyu,  tugoti ko ninyo nga magpasalamat  ko’g  daku  sa kinatibuk-ang  management dinhi sa CDN Digital pinangulohan ni Edra Benedicto, among Editor-In-Chief nga gipa-apil nako dinhi sa pagsuwat sa akong lindog/column nga “Super Hirit.”

Salamat kaayo Edra sa pagsalig ug kompiyansa kanako taliwa sa pagkayanong magsisibya dinhi  sa Sugbo.

Maglaum ko nga gawas sa akong mga naandang tigpaminaw sa radio station DYSS Super Radyo sa GMA, dawaton sab unta ko ug padayonon sa mga followers dinhi sa CDN Digital tibuuk kalibutan sa ilang tagsa-tagsa ka computers, tablets, smart phones ug ubang kahimanan nga maka-access niining bag-ong platform.

Mopasalig ko kaninyo nga mopadayon sa pagka responsable ug magpakatakus sa pagpangalagad.

Again, salamat kaayo Ma’am Edra, Raffy Escoton, Ma’am Doris Bongcac ug sa tanan nako’ng kaubanan dinhi sa CDN Digital.

*****

Mas sadya, mas bibo ug mas mabulokon ang Sinulog 2020 kung dunay mga street parties ug Sinulog concerts sa mga strategic nga mga lugar pagkahuman sa grand parade gawas sa giplanohan nga one big party/concert diha sa South Road Properties duha ka adlaw sa di pa ang grand parade.

Labaw na gyu’ng alegre kung itugot ang inom. Kung sa taga amo pa bitaw, laay gyud ang fiesta kung way tagay.

Ang importante nga makaya pag-control ang mga unruly partygoers ug kayahon sa atong mga traffic enforcers ang paghapsay sa atong mga kalsada.

Kining maong mga kalihukan maghatag kini og dugang attraction natong mga Sugbuanon ug sa mga bisita tugbang sa religious aspect nga mga kalihukan.

Makahatag sab kini og positive impact sa ekonomiya sa Sugbo kung daghan atong mga bisitang langyaw kay buhi gyud ang negosyo sa tanang Sugbuanon.

Positibo ko nga makaya ra sa atong mga otoridad ang pagbantay kay ang tuyo sa mga mamistahay mao man gyud ang paglingaw-lingaw ug dili kagubot.

Kung epektibo gyud ang pag shutdown sa mga signal sa tanang mga telecommunication companies paglikay sa mga terorista, kinahanglang atong suportahan.

Nakasabot ko ni acting Cebu City Police Director Col. Giovani Maines nga iyang supakon kining mga kalihukan ilabina kung magdungan kay dili nila makaya pagbantay.

Pero dili ba gud mahimo sa mga kadagkuan sa PNP nga mopa-augment kita og dugang puwersa sa kapolisan gikan sa lain-laing mga probensiya?

*****

Si Lorenzo “Bong” Basamot, opisyal sa Cebu City Hall, nag atubang karon ug pasangil nga mi-sexually harass sa usa sa mga empleyada nga job order.

In fairness ni Mr. Basamot, kinsa kanhi kapitan sa Camputhaw, puwerte’ng panghimakak sa mga pasangil ug gani mikiha nag libel sa tulo ka mga babaye kay naulawan pag-ayo ang iyang pamilya.

Matud pa nga sa sinugdanan, dili intresado ang empleyada nga mokiha ni Basamot apan napugos pag-execute og affidavit kay dunay mga kauban sa partido nilang Mayor Labella ang  mihulga nga taktakon sa trabaho ang biktima kay ang tuyo gamiton sa pagdaot kang Basamot.

Sa akong interview, si Basamot nga maoy campaign manager kaniadto ni City Councilor Niña Mabatid, mitumbok nilang Ramil Ayuman ug Jun Alcover nga maoy nag-instigate sa complainant.

Matud pa dunay axe to grind sila si Ayuman ug Alcove kaniya ug ni City Councilor Mabatid kay gipang junk ang duha atol sa miaging midterm elections.

Sila si Ayuman ug Alcover anaa nahimutang sa ika 15 ug 16 pagka City Councilor diha sa Camputhaw diin si konsehal Mabatid anaa sa ikaduhang puwesto.

Si Mabatid mikiha na sab og libel nilang Ayuman, Alcover ug sa usa sa mga reklamante human nga siya gipasanginlan nga mimando sa reklamante pag-withdraw sa kaso.

Si Mabatid nangayo sab nilag 5 million pesos damages ug may plano pa nga mokihag 10 counts nga cybe libel.

Kining ilang away mao na ni ang timailhan nga nabuak na gyud ang ilang partido ni Cebu City Mayor Edgardo Labella ug Vice Mayor Michael Rama .

Kay kung intact pa ang ilang partido way manggawas nga mga baho diha sa CityHall.

Gubot pas luko ning ilang kahimtang karon.

Nagkatawa ron si former City Mayor Tomas Osmeña ug ang mga sakop sa BO-PK.