Faces of Cebu

FACES OF CEBU: Dodo Fineza, 58

Taga Camiguin gyud among pamilya pero kadtong otso anyos ko, nakakita og trabaho akong Papa diri sa Cebu mao nga namalhin mi. Naa mi nagpuyo ron sa may Labangon.

Baynte anyos nako kapin sauna pero wa pa koy trabaho. Nagpa-boy ko… laba, hugas plato, limpyo balay. Wa ko ganahi nga mao ra to akong gibuhat. Nakakita kog laing trabaho. Nahimo kong konduktor sa jeep. Ang drayber ang nagtudlo nako unsaon pagdrive basta di lang ko niya swelduhan. Pag 1989, nakakuha na ko og lisensya.

Pag 1990, nahimo nako nga taxi driver. Hangtud karon, 2019, human sa 29 ka tuig, taxi driver gihapon ko. Mao ni nga trabaho nga nakapahuman sa akong duha ka anak. Nahuman sila og kurso sa IT unya naa sila nag trabaho ron sa BPO companies.

Sa sud sa 29 ka tuig nga nag taxi driver ko, wala pa gyud ko mapahawa og kompaniya. Kana rang ma bankrupt ang tag-iya mao nga mopahawa nako. Pero dali ra sad ko makakita og laing kompaniya. Continuous ba… wa koy putol og trabaho except katong na-operahan ko.

Nagka-colon cancer man ko. Kaduha ko na-operahan: niadtong 1999 ug 2011. Maundang ra ko og trabaho inig human og opera pero mobalik ra sad ko og trabaho.

Ganahan ko sa akong trabaho kay daghan kong mahimamat nga mga tawo. Naghunahuna bitaw ko nga mo-retire na pero kapoy man magpuyo ra sa balay. Mao nga hangtud karon mo-drive lang gihapon ko.

TAGS: FACES OF CEBU
Latest Stories
Most Read

Subscribe to our regional newsletter

By providing an email address. I agree to the Terms of Use and
acknowledge that I have read the Privacy Policy.