Santo Papa, simbolo unta sa gugma ug kalinaw
Usa gyud ka dakung salawayon ang pagpanghapak sa atong Santo Papa ngadto sa usa ka babayeng Romano Katoliko. Asa naman ang atong pagtulun-an nga mercy and compassion?
Makadawat pavko kung usa ka ordinaryong pari ang mihimo. Pero Santo Papa, porbida gyud!
Daku kining tamparos sa Simbahan.
Tinuud, sad-an sab ang babaye nga namunlot sa bukton sa Santo Papa. Pero unsaon man nga siya may simbolo sa Simbahang Katoliko nga giisip maoy labing masinabtanon unta sa sitwasyon.
Di makabasol ang simbahan sa mga negatibong komentaryo sa publiko kay kining pagsaway tawhanon sab ni.
Haskang lisuda pag-justify sa nahitabo ngan nga bag-o pa kitang nag Pasko unya kita dinhi sa Sugbo magsaulog na sab sa kapistahan ni Senor Santo Niño unya sa sunod tuig kita maoy sentro sa selebrasyon sa ika 500 ka tuig sa atong pagka Kristiyano.
***
Over acting ra kaayo ang mga personnel sa Cebu City Traffic Office (CCTO) o CITOM niadtong Huwebes (Jan. 2) nga akong naabtan kay ilang gipang angklahan ang mga sakyanan sa mga nanambong og kasal diha sa Saint Therese Parish Church sa Barangay Lahug nga naka-parking sa kilid sa kalsada sa simbahan.
Grabe gyud, way konsiderasyon. Way prior notice.
Sumaa pa ni Mark Sotto usa sa mga na clamp, nga kung nag megaphone ang mga traffic enforcer apan dili gihapon nila madunggan sud sa simbahan ngan nga naatol ang pagkimpit sa seremonyas sa kasal.
Nalooy ko sa mga tag-iya kay bisag gihangyo nila pag-ayo si Police Captain Jack Aton, team leader nga patangtangan og mga clamp tungod sa kahasol apan igo ra silang giingnan nga ipa adto ang opisina sa CITOM diha sa Ramos aron i-settle kay wa sab sila magdalag yawe sa mga clamp.
Misuway ko pag-interview ni Aton apan nibalibad.
Si Monsignor Guillermo Gorre, team moderator sa Saint Therese, nakasaway sab sa gihimo sa taga CITOM.
Tinuud man nga way kasing kasing ang balaud pero ang tawo nga naggama sa balaud dunay konsensiya.
Ang mga biktima, way kalainan sa atong mga opisyales sa Siudad sa Sugbo nga paludhon og kasal ug mapugos pag-parking sa kilid kilid sa simbahan sa oras nga wa nay kaparkingan.
Ambot nga sa kadaghang lugar nganong sa simbahan sila mi-operate nga unta dili man busy ang lugar ikomparar sa mga dagkung kalsada.
***
Misamot ang problema sa illegal nga drugas dinhi sa dakbayan sa Sugbo kay wa pa gani mag-usa ka simana gikan nga atong gisugat ang year 2020 nakasakmit atong kapolisan og sobra 30 milyones ka pesos nga shabu.
Mas mograbe pa gyud kini sa umaabot nga mga adlaw tungod kay misaka ang demand sa illegal nga drugas sa kapistahan ni Senyor Santo Niño basi sa intelligence report sa kapolisan.
Daku kining hagit sa Philippine National Police ug Philippine Drug Enforcement Agency (PDEA) unsaon pagsulbad ning maong problema.
Maglaum ko nga molampos gihapon sila sa pakig gubat ug dili sila maluya ug magtugtug sa pansitan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
