‘Total lockdown na ta oi’
Kinahanglang mo-level up na ta sa atong gipatuman nga enhanced community quarantine (ECQ) sa tibuuk Sugbo.
Unsa may gidugayan nila ni Cebu Governor Gwendolyn Garcia, Cebu City Mayor Edgardo Labella, Lapu-Lapu City Mayor Junard “Ahong” Chan, Mandaue City Mayor Jonas Cortes ug ubang mga local chief executives sa pagpatuman og total lockdown sa Sugbo?
Klaro naman kaha nga duna nay community transmission o grabe na ang pagpanakod sa coronavirus disease 2019 o COVID-19 sa mga nagpuyo sa Sitio Zapatera, Barangay Luz.
Gani sumaa pa ni Cebu City Health Officer Dr. Daisy Villa nga maconsider na nila karon nga ang tibuuk Sitio Zapatera kontaminado na gyud sa virus kay ang isig ka tumoy sa dapit dunay mga nag-positibo.
Magpaabot pa ta nga mokatap ni pag-ayo sa mga silingang Barangay ug sa tibuuk Sugbo? Ang Barrio Luz o Barangay Luz maoy epicenter dinhi sa dakbayan ug sa tibuuk Central Visayas.
Ang akong ponto mas maayo nga mopatuman ta’g total lockdown bisag duha lang ka semana tungod ning maong kalambuan karon nga daghan na kaayong natakdan sa Sitio Zapatera nga miabot na’g 135 basi sa figure kagahapon.
Kuwang pa ni ang pagpatuman og total lockdown sa entire Barrio Luz kay misaka na sab sa Labangon. Nagpasabot nga north ug south na ang gi-igo sa kagaw. Mi increase sab sa Lapu-Lapu ug Mandaue.
Tiaw mona nahibaw-an ron ni Governor Garcia nga dunay human smuggling o sekreto nga pagpasakay og mga tawo nga dili authorized sa mga delivery truck ug sa mga ambulance aron lang makabiyahe ug makalusot sa mga checkpoints bugti sa pagbayad og dagkung kantidad.
Mao ni ang hinungdan kung way total lockdown nga ipatuman. Daghang mo-abuso.
Gawas sa total lockdown kinahanglang ipatuman gyud ang massive testing sa mga residente ug kabanay nga silingan sa mga nag-positibo dinhi sa dakbayan sa Sugbo.
Kutob sa atong available nga testing kits kinahanglang gamiton unya kung kuwang pa kaayo magpalit pa kita’g daghan.
Ang tanang positibo ibutang sa mga hospital ug sa mga isolation facilities. Sa kaso diha sa Sitio Zapatera, kinahanglang buwag buwagon ang mga nagpuyo aron dunay social distancing kay sobra gyud ka dikit-dikit ang mga panimay diha.
Among na-interview kagahapon ang usa ka maestro nga naapil og kalockdown diha sa Sitio Zapatera nga naghilak ug siya mihangyo nga ibalhin intawon ug ibulag intawon kanila ang mga nag-positibo.
Gawas niini iyang gihangyo nga ipadayon gyud ang massive testing diha sa ilang lugar aron silang tanan mahimutang kay naluya sila sa stress ug labaw sa nga tanan mao ang pagkondenar sa mga netizens nilang mga residente.
Tinuud puwerte’ng louya gyud sa taga Barrio Luz karong panahuna apan unsaon man nga di sab gyud kalikayan nga makapastigmatize o makapahadlok gyud ang COVID-19.
***
Tungod sa pagkabalungon ning uban nga nagsige gihapon og laroy-laroy sa kadalanan taliwa sa ECQ o modified lockdown nga maoy gitoho-an nga midaghan ang kaso, dunay mga crazy idea nga gisugyot aron patagam ug panghadlok.
Usa na niini mao nga puslan man nga di gyud mahadlok sa mga pulis ang mga violators, hay mas maayo kuno nga kadtong mga asymptomatic nga mga COVID-19 positive sa Barrio Luz maoy pabantayon sa mga checkpoints area.
Laing sugyot nga kadtong mga mo-violate adto na lang sila palimpiyohon sa mga ospital nga dunay mga COVID positive.
Duna say mihangyo nga panglapdosan og binugha kadtong mga gahi’g ulo sama sa India.
Sa tinuud kining maong mga sugyot mugna kini sa mga tawo nga dedicated kaayong mituman sa stay at home order ug medyo naburyong na tungod sa pagkabadlungon sa uban.
Bisan ako mapungot gyud nga magtan-aw sa ubang mga tawo nga magtambay tambay sa kalsada ug magjogging nga morag way nahitabo.
Saludo gyud ko sa mga residente nga nagkahiusa karon nga di magpataka og pasulod sa ilang lugar sa mga tawo nga estranghero.
***
Nakatilaw og daghang pagsaway ang school administration sa University of San Carlos (USC) tungod sa ilang tinguha nga mo-abli pagbalik karong Mayo 4 human nga malibkas unya ang ECQ karong April 28.
In fairness sa taga USC, posibleng kadtong maong plano naumol dihang wa pay kaso sa COVID-19 ang Barrio Luz ug dihang namahayag si Mayor Labella nga wa siya’y plano nga lugwayan ang ECQ.
Kay bisan tingali ang ubang eskuwelahan, nagtinguha gyud nga makabalik og sayo sa ilang operation human masulbad ning problema nga atong gi-atubang. /dbs
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
