Ang hashtag nga ma translate ngadto sa Iniglis og “show me a cute soldier” mao karoy gauna sa social media sa Thailand human mo coup d’ état ang military didto ug mibutang sa tibuok nasud ubos sa martial law.
Nimata na man lang gud ang mga Thailanders nga may daghan na nga sundao nga ga linya sa ilang kadalanan. Ug tungod tingali kay dugaydugay na nga wa sila makakita og ingon niani nga talan-awon ila dayong gipamiktyuran kining mga sundao. Wa madugay diha gyuy pipila ka babaye nga mitupad sa sundao ug nag “selfie.”
Ug wa madugay nag trending na ang maong behavior ug daghan na ang mihimo sa ingon. Hangtud nga mura na kinig contest kon kinsay nakatupad sa para kanila pinaka ambungan nga man in uniform.
Nahitabo usab kini sa Donetsk ug sa ubang bahin sa southern Ukraine diin ang mga bata ug mga dalaga mo posing ug mo selfie uban sa mga pro Russia nga mga sundao.
Nagkanayon ang usa ka negosyante sa Bangkok nga nihinay ang kasagarang parte sa ilang ekonomiya. Ug ang gituohan niya nga mopadayon pagkita mao ang ilang export industry nga naglakip sa mga computer parts ug camera. Ang akong Nikon D90 ug Fujifilm X-M1 puros hinimo sa Thailand.
Kining atong presidente nga si Noynoy Aquino saputon kon dunay mosugyot kaniya og martial law, ang mayoriya sa mga Thailander malipay kon dunay martial law. Matud pas usa ka ginang, pagkakita kuno niya sa mga sundao mura kuno siyag nakakitag langit.
Ang Thailand diin nagagikan ang Thai massage nga usa ka stretch oriented nga masahe naka 18 na ka kudeta sulod sa 80 ka tuig. Mao nga di na kaayo sila matarantar kon makakitag sundao sa kadalanan.
Tingali may kalabutan niani ang ilang pagka constitutional monarchy. Tingali gatuo sila ang ilang gobyerno ug military, sama kanila, ubos sa ilang hari. Tingali mao kini ang magic sa monarchy nga duna pay naa sa taas sa ilang gobyerno ug nga kon magpadlong kini mahimo kining tangtangon og ilisag lain kay ang tinuoray nga gahum naa man sa Hari.
Ang unang lakang nga gihimo sa general nga gadala karon sa ilang gobyerno, mao ang pagpatawag sa mga pangulo sa mga nagkasumpaki nga pundok. Nalipay ra pud ang mga tao kay husay na ang ilang pagpadung sa ilang trabaho-an kay wa na may mga rally nga mosugat kanila.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
