Wala na karon mag-inusara si Ramon “Bong” Revilla Jr sa bag-ong bilangoan diin siya nabalhog. Duna na siyay silingan, ang iyang kauban sa buhat nga si Jose “Jinggoy” Estrada. Puros sila mga senador nga karon gi-kasuhan og plunder tungod sa mga minilyong gi-ingong nakuha nila pinaagi sa paghimo, uban kang Janet Lim-Napoles, og mga fake o nonexistent nga non-government organizations nga maoy recipient og funding gikan sa gobyerno.
Niadtong ulitawo pa kining duha, nalambigit kini silag maingon tang rivalry. Silang duha ang naninguha ni Lani Mercado nga usa pa ka artista niadto ug nga usa na karon ka representante sa Kongreso. Si Revilla maoy nakakuha sa kasing-kasing ni Mercado ug nga karon daghan na silag anak ug gani dunay pipila nga ga-artista na usab sama kanila.
Daw babaye gyud ang mo-connect ning duha ka mga politikong actor. Pero kun sa una, gugma sa babaye ang naglambigit kanila, karon kwarta na sa usa ka babaye ang nag-join kanila. Ang kwarta sa ilang giingong konsabo nga si Janet Lim-Napoles nga maoy giingong mastermind sa pork barrel scam.
Duna nay mga showbiz celebrity sa Pinas nga napriso ug dili si Bong ug Jinggoy ang ga-una. Ang amahan ni Pops Fernandez napriso sa pagpatay og usa ka negosyante. Human siya buhii, giingon nga na-involve siya sa drug trade nga maoy nahimong hinungdan sa iyang kamatayon kay nakigpinusilay man siya sa mga pulis.
Ang laing sikat nga napriso mao si Robin Padilla. Illegal possession of firearms ang nahimong paglapas ni Padilla.
Sa America, nakuhaan na usab og mug shot sila si Mel Gibson, Mischa Barton, Heather Locklear, Michelle Rodriguez, Kiefer Sutherland ug Reese Weatherspoon sa violation nga DUI o driving under the influence o sa ato pa, ga-drive nga hubog.
Sa mga Briton, nasikop na sila si Hugh Grant ug George Michael niadto. Parehas nga may kalabutan sa sex in public places o public scandal ang ilang nahimo. Ang nakalahi lang kay tungod gay man si Michael, lalake ang iyang kapares.
Ang nakalahi lang sa sitwasyon ni Bong ug Jinggoy mao nga pangawat ang ilang kaso. Biga ug paugat ang hinungdan nga nakalapas sa balaud ang ubang celebrity pero daw panglungkab kining sa duha ka senador.
Unsa kaha karoy gi-istoryahan sa duha samtang gahuwat sila sa ilang non-showbiz guru nga malagmit mahimong record holder tungod sa iyang edad, ang 90-anyos nga senador nga si Juan Ponce Enrile.
Sama sa duha, plunder usab maoy kaso ni Enrile ug gi-ingong konsabo usab kini ni Napoles.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
