Inutil ang mga jail warden sa mga palusot?

Bisan pa kuno kung may x-ray machines ug may mga K9 dogs dili gihapon malikayan ang mga palusot sa drugas sa atong mga prisohan.

Mosamot gyud ang problema kung magtinanga ang atong mga jail officers ug ilabina kung mabayran sa mga drug lord.

With all due respect, sa atong mga jail warden sa lain-laing jail facilities nga mitunga sa among programang “Dialogue On The Air” niadtong Sabado sa DYSS Super Radyo, dili ko konbinsido sa ilang giingon nga kutob ra sa estorya ang giingong palusot sa shabu sa prisohan kay kuno wa silay konkretong ebidensiya.

Dili pa konkretong ebidensiya nila ni Supt. Johnson Calub warden sa male dormitory sa Cebu City Jail ang ilang pangangkon nga dunay dinakpanay sa sulod ug ilang gipangkiha?

Nakasabot ko nilang Supt. Calub ug Cebu Provincial Detention and Rehabilitation Center (CPDRC) warden Romeo Manansala nga midepensa nga dili sila mga incompetent kay uwaw sab kaayo nga sila mangangkon.

Kung wa pay shabu sa sulod sa mga prisohan, nganong mosamot man ka addict sa illegal drugs ang mga makagawas na?

Naay among silingan nga gipa-priso sa amahan tungod kay miguba sa ilang aircon ug washing machine apan paggawas sa Cebu City Jail, nahimo nang shabu dealer ug daghan na hinuon kaayong amigo nga tigbaligya ug drugas? Mao nga di ko motuo ni Supt. Calub nga siya mo-ingon nga ang anaa sa sulod kutob ra gyud sa transaction.

Kung wa pay shabu sa sulod sa male dorm sa Cebu City Jail dili ma-ambush patay kadtong igsoon ni piskal Simaco Labata nga si jail officer Leo Labata kinsa usa ka anti-drug crusader.

Mas makatuo ko sa gi-sulti ni C/Inspector Corazon Noel jail warden sa female dormitory sa Cebu City Jail nga way shabu sa ilang prisohan kay ang mga babaye nga dinakpan mosamot man ka gwapa inig gawas kay sa mga lalaki nga bangog gihapon sa drugas.

Wa gyud kaha mahalin sa mga drug lord ang uban atong mga warden ug ilang mga jail officers ilabina nga mas dagko pag madawat sa ilang retirement package?

* * *

Dili siguro angay’ng lalisan ug awayan nato kining mga century-old acacia trees gikan sa dakbayan sa Naga ngadto sa dakbayan sa Carcar kay pulos man kaayo-han sa tanan ang isyu.

Alang lagi nako dili na kinahanglang putlon ang gatusan ka mga puno-an kay pwede kining pangitaan ug paagi nga makalikay sa risgo ang mga pasahero.

Dili ba gud puwede nga patuparan ug pabarugan ug lig-ong pondasyon ang matag puno-an ug igakos sa pondasyon aron dili matumba?

Dili ba gud pwede nga dunay lig-ong kable nga iba-at sa taas nga bahin sa puno-an ug igapos sa laing poste aron nga kung matumba dili pabor sa kalsada?

Dili na ba gyud pwede nga mag-abli ta ug laing mga daan aron likayan ang mga acacia?

Akong subli-on nga wa koy supak pagputol sa mga puno-an nga risgo na gyud kaayo.

* * *

Maayo kay nadakpan na si retired M/Gen. Jovito Palparan kagahapon sa kadlawn sa may Sta.

Mesa, Manila aron atubangon niya ang iyang mga asunto sa korte.

Nahimo siyang wanted ug dunay patong sa ulo nga 2 million sa kasong kidnapping ug illegal detention nga gipasaka sa mga ginikanan niadtong duha ka aktibistang estudyante sa University of the Philippines nga sila si Karen Empeno ug Sherlyn Cadapan.

Gidakop si Palparan sa nagkahiusang pwersa sa National Bureau of Investigation (NBI) Anti-Organized Crime Division ug Armed Forces of the Philippines (AFP) Naval Intelligence Group.
Akong tan-aw medyo nalipay si Palparan nga nadakpan ug mas kampante sa NBI detention cell

kay hadlok siyang kuoton sa mga rebelde.

* * *

Simbako intawn labngon ug pito ka lawd nga mo-abot sa atong nasud ang makalilisang nga sakit mugna sa Ebola virus nga migrabe didto sa West Africa ug Liberia.

Si Liberian President Ellen Johnson Sirleaf nangayo ug despensa sa pagkamatay sa 3 ka mga doctor ug 32 ka mga health workers sa ilang lugar tungod sa outbreak sa Ebola virus.

Paeta gyud sa sitwasyon didto kay ang mga health workers nahadlok na mga mo-responde sa mga lugar nga misanap ang mga sakit.

Tiaw muna wa nay mihipos sa mga minatay didto kay mahadlok sab nga mataptan.