Tuo ug wala ang mga balikas kagahapon sa mga commuters ug mga motorista sa mga dagkung kalsada nga gipasirad-an ang pikas lane.
Pipila ra gyud sa mga pundok ang nalipay sa ilang kalihukan sama sa mga nag-biseklita, nag-skate boarding ug sa mga nag-hike nga klaro kaayong pasikat.
Sama sa akong giingon nga dili seguro unta mahasol ang publiko kung gitumong pa ang kalihukan sa lawom nga gabii.
Sa sunod Mayor Michael Rama konsultaha intawon ang kinabag-an una kamo motugot sa mga kalihukan nga nagpatagbaw sa interest sa pipila.
* * *
Init ra kaayo’g ulo si Insp. Rogelio Amoroso, hepe sa Law Enforcement Section sa Lapu-lapu City Police Office, nga namusil sa waiter ug bouncer sa usa ka restobar sa Basak, Lapu-lapu.
Patuga’g hubog-hubog unya dili maka-maong modala sa kaugalingon.
Lahi ra gyud ni sa among kaliwat kay sa panahon nga mag-inom likayan gyud ang pagpangaway ug magpasulabi lang sa mga estoryang kataw-anan ug manganta.
Nganong dili man murder ang gi-andam nga kiha sa Homicide Section batok kang Amoroso? Homicide nalang kay kauban ra nilang pulis?
Akoy gisayangan sa kinabuhi sa batan-ong waiter nga napatay sa pulis nga si John Stephen Lagsanay kay makatabang pa unta sa naglisud niyang pamilya.
Kung tinuud pa nga nasumbagan ang pulis sa bouncer nga si Archie Gesta, nganong wa may bun-og iyang nawong?
Maglaum ko nga tarungon nila kini pag-imbistigar aron dili na modangop ang mga pamilya sa mga biktima ngadto sa National Bureau of Investigation.
Kung estrikto ang PNP nga bawal gyud sa mga pulis nga duty o bisan off-duty nga mosulod sa mga imnanan ug mga sugalan, nganong daghan man gihapong mga badlungon sa PNP organization?
* * *
Kuwang gyud sa political will ang Rama administration ug Cortes leadership paglimpiyo sa Mahiga creek nga maoy magdalag baha sa mga sikbit nga lugar ilabina diha sa SM City Cebu.
Nahurot na ba ang pagpangguba sa mga panimay daplin sa creek sa Cebu City side? Karon target na sab nila ang pagguba sa mga footbridges.
Kumusta man sab ang liderato ni Mandaue City Mayor Jonas Cortes nga nagsigeg pagarpar kaniadtu nga mangguba sab sila sa mga bay sa Mandaue side diha sa Mahiga creek?
Sa tinuod lang manggawas ning mga estorya kung magsige nag baha.
Pero kung way baha, malimtan na sab ang mga plano. Way kalainan kining isyuha sa master drainage plan for Metro Cebu.
Nagdaku lang ang plano pero way implementasyon.
* * *
Puwerte’ng sadya-a gyud sa among culmination activity sa 20th Press Freedom Week celebration niadtong Sabado sa gabii sa Dohera Hotel sa dakbayan sa Mandaue.
Ngan nga sila si Ma’am Girlie Garces sa San Miguel Brewery Incorporated uban sa taga Kepco SPC Power Corporation ang nag-sponsor, bongga gyud ang panihapon ug nagbaha ang beer.
Tungod sa kadaghan sa beer, gikaligo nalang sa uban.Hehehe. Salamat Ma’am Girlie sa padayong suporta sa Cebu media.
Nalingaw gyud ang tanan ilabina pagsugod na sa dance presentation nga “Korean Pop” sa different beats.
Kami sa Palace of Justice beat o (Media Alliance for the Law, Liberty, Equality and Truth – Mallet) nga tagsa nalang mag-abot nagpaka-uwaw gyud ug sayaw bisan wa maka- practice. Ang importante nga nakapakita kami sa among talagsaong talento ug diha sa way praktisay anaa ang alegre kay di magka-dimao.
Magpasalamat sab ko sa akong mga kauban sa hiniusang puwersa sa Capitol and justice beat volleyball team kay kami ang ni-champion sa duwang volleyball batok sa mga tigbalita sa Cebu City Hall niadtong Sabado sa buntag didto sa Cebu Eastern College (CEC).
Again magpasalamat kaayo ko sa management sa CEC nila ni Sir Jefferson Go, Sir Sammy Sia nga mga executive board ug ni Sir John Maraat kay puwerte kaayong nakasuporta sa among mga sports activities.
Salamat sab kaayo sa tagdumala sa Coca Cola Bottlers Philippines nga maoy mi-angkon sa premyo ug ingon man ni Ma’am Michelle So sa Press Freedom executive committee.
Magpasalamat sab ko nilang Sir Bobby Inoferio NBAC commissioner ug sa grupo nilang Sir Danny Villagracia ug Sir Titing Navaja nga maoy nag-officiate sa among liga sa volleyball.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
