Duhay kinatsila sa payong. “Parasol” kon gamiton kini para sa pangang sa init sa adlaw. “Paraguas” kon gamiton kini panagang sa uwan. Mas nipis ang parasol ug dili water proof.
Tingali angay na nga maghimog bag-ong termino sa payong ang mga Katsila. Mahimo nila kining tawgon og “paragas.” Tungod kay gigamit karon ang payong sa mga pro democracy protesters sa Hong Kong ang payong isip panagang batok sa tear gas nga gitira kanila.
Tuig 2017 pa ang Hong Kong mopili og mga opisyal sa ilang gobyerno. Pero mihatag na og pulong ang Beijing (ang capital karon sa China) nga silay mohagpat sa mga posibleng kandidato para sa maong mga opisyal.
Wa mauyon ang mga batan-on sa China ug mao nga ga protesta sila sa kadalanan. Ilang gibabagan ang mga agi-anan paingon sa mga opisina sa gobyerno. Ug mao nga gikinahanglan silang papahawa-on sa maong lugar. Ang pulis nga mopa-pahawa kanila migamit og tear gas. Ang panagang sa mga protesters mao ang payong. Ug maong gitawag sa media kining protesta nga ga sige karon sa Hong Kong og “The Umbrella Revolution.”
Ang bana-bana mao nga may upat na kalibo ka tuig ang payong. Ang unang gamit niani mao ang pag pandong sa hari para dili kini mainitan sa adlaw atol sa usa ka parada. Tungod tingali niini, mas naila kini nga parasol.
As expected gauna ang China sa pagpagawas og foldable ug waterproof nga payong. Niadto pang 21 AD na conceptualize kini sa mga Insik. Apan karon lang tuiga nahibaw-an, sa Hong Kong, China, nga gamit diay kini sa mga protest rally agig panagang sa tear gas.
Ang mga layshu nga Briton motawag sa ilang payong og “brilly,” slang sa umbrella. Didto sad sa England ang unang “all umbrella” shop. Niabre ang “James Smith and Sons” niadtong 1830 sa 53 New Oxford Street sa London, England. Naa lang gihapon kining maong shop didto.
Sa ato, maurag mauwaw ang mga lalake nga magdag payong. Ambot kon ngano? Ang magbabalak ra tingali nga si Mel Baclay maoy akong higala nga komportable rang modag payong.
Ang hinungdan kuno nga wala maimbento sa Pilipinas ang payong kay tungod daghan kitag dahon sa saging ug dahon sa gabi nga atong ika-pandong kon mag uwan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
