Hapit tanan tingali nato nakadungog naman kabahin ni Cinderella. Ang anak sa unang asawa nga gidaugdaug sa iyang stepmother ug duha ka step sisters. Mitambong siya sa usa ka party ug didto naibgan siya sa prinsipe. Gadali siyag pauli kay duna siyay curfew. Tungod sa iyang pagdali nahabilin iyang step-in ug ang prinsipe wala makahinabi kaniya. Kamo nalay sumpay sa chase nga midagsa ngadto sa “happily ever after.”
Gi-ingon nga dunay 355 variations or versions ang Cinderella. Ang pinaka inila mao ang gisulat ni Charles Perrault ug kadtong gihimo sa Brothers Grim. Ang French version ni Perrault gisulat niya sa pagka 1697. Ang German version sa managsuong Grim milugwa pagka 19th century ug “Aschenputtel” ang title niani.
Ang gituohang unang version sa Cinderella mao ang sugilanon ni Rhodopis nga usa ka ulipon nga Grega nga gipangasawa sa hari sa Egypt.
Gisaway sa maong sugilanon mao ang panginahanglan og fairy godmother ug magical tree para magmalampuson ang usa ka dinaugdaug.
Usa sa mga definition sa Merriam Webster on-line dictionary sa pulong nga Cinderella mao ang – “one suffering undeserved neglect.”
Sa Pilipinas karon, daghang politico ang buot modala sa papel ni Cinderella. Ang gauna sa audition mao sila ni Senador Antonio Trillanes ug Vice President Jejomar Binay.
Grabe na kuno ang pagdaugdaug sa senado kaniya mao nga nisantop sa hunahuna ni Binay nga makig debate na lang siya kang Trillanes uban kang Senador Allan Peter Cayetano nga maoy gapunay og hisgut sa gi-ingong iyang pag pangwarta sa mga proyekto sa Makati, diin siya milingkod isip mayor. Gidawat ni Trillanes ang hagit ni Binay. Karon unta tong 27 sila maglantugi.
Apan daw mikalit og bali ang hangin nga mihuyop sa layag ni Binay. Ga sul-ob siyag sleeveless nga shirt nga may marking “navy” (kay gisaulog man niya ang iyang adlaw nga natawhan uban sa mga sundaw) dihang iyang gi-atubang ang media nga iyang gi-ingnan nga di na mahinayon ang debate. Di na siya makig lalis ni Trillanes.
Ngano man?
Matud pa ni Binay di na siya makig-debate kay wa siya mauyon sa drama ni Trillanes nga magpa underdog. Wa siya mauyon sa gipalakaw sa Senador nga mas maayo ang vice president sa debate kay kaniya kay abogado kini ug daghan na kinig debate nga naagian kay dugay na kini sa politica. Wa mauyon si Binay sa casting nga siya maoy Goliath sa kang Trillanes. Sa sward speak pa daw miingon si Binay og –shudi mag Cinderella kay oka na!
Ang nakaparat pa gyud ni Binay kay diha mobahag iyang ikog atubangan sa mga sundaw sa Navy. Ang disiplina ra ba sa mga sundaw mao ang pagdasdas sa way atras-atras. Unsa naman lay ikasulti sa mga sundaw nianing gustong mag-presidente – Faet ma?!
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
