Tuguti nga akong ipublikar pagbalik ang akong lindog niadtong December 3, 2014 kay gihagu-an intawon pagtubag ni Cordova Mayor Adelino Sitoy.
Mao kini: “Unsa ka tinuud nga nang-harass si Cordova Mayor Adelino Sitoy sa mga tawo ni attorney Augusto Go nga gipabantay sa naulahi diha sa Shell Island niadtong Lunes sa hapon?
Basi sa akong mga tinubdan nga gipapalayas ni attorney Sitoy ang mga tawo ni attorney Go ug gipang-ingnan nga kun dili mamahawa iyang ipa-priso.
Gani matud pa nagdala si Mayor Sitoy ug mga pulis aron gyud paghadlok sa mga gitugyanan ni attorney Gus Go diha sa Shell Island.
Akong nahibaw-an nga ang Shell Island nga mo-abot ug 3 ektaryas gi-abangan nila ni attorney Go ug Frederick Ong ug dunay lease agreement tali nila ug sa taga Department of Environment and Natural Resources (DENR) sulod sa 25 ka tuig.
Gikuwestiyon sa kampo ni attorney Go ang pagpasagad ni attorney Sitoy ug gani gi-akusahan ang mayor nga namulitika kinsa nang-interest sa Shell Island kay ma-igo sa iyang proposed 3rd bridge nga gastohan ug binilyong salapi.
Akong gitawgan si Mayor Sitoy kagahapon agig pagkuha sa iyang reaction apan matud niya nga nagtigom pa sila ug patawgon ko pagbalik.
Apan dihang akong gisubli pag-contact mi-ring man tuod apan gipawong sab dayon.”
Si attorney Sitoy nga usa sa mga beterano sa pinulongang Binisaya ug respetado sa legal profession ug sa academe, mihatag ug katin-awan sa iyang tulo ka pahina nga suwat address kanako ug mao kini ang unod:
“Tinahod nga Lloyd, pasayloa nga wala gyod ko kahinabi nimo sa cellphone kay may miting ko pagtawag nimog una ug sa ikaduha nagsimba na ako sa Birhen sa Regla kay nagpamisa ko alang kang Papa ug Mama.
Gibali ang giistorya diha nimo mahitungod sa Shell Island. Mao kini ang tinuod:
Igo lang ko nagpatuman sa sugo sa CENRO, DENR, nga pahawaon ang mga tawo nga anaa sa Shell Island. Ania ang kopya sa sulat ni OIC, CENRO, Raul C. Pasoc kanako nga gipitsahan og Nobyembre 24, 2014.
Gisukip sa iyang sulat (gipitsahan og Nobyembre 24, 2014) ang iyang demanda ngadto sa mga tawo nga nagpuyo sa Shell Island nga mao sila si: Security guards Fanpilo C. Barnayja; Danilo S. Capillanes; Renato Cualbar; Juanito A. Terante; Mr. and Mrs. Ruel Dumada; Mr. and Mrs. Berto Canito ug Mr. and Mrs. Nardo Canito.
Sa sinugdan, ang Shell Island gideklarar sa ngalan sa Cebu Coliseum Complex, Inc. (CCCI) ug sa Cordova. Apan sa usa ka legal opinion sa Cebu Provincial Legal Officer, Atty. Orvi G. Ortega ug Asst. Cebu Provincial Legal Officer, Marino E. Martinquilla nga gipadala ngadto sa Cebu Provincial Assessor, habason gayod ang maong mga Tax Declarations. Ania ang ruling sa Provincial Attorney, gipitsahan og Enero 13, 2014 akong gisukip dinhi.
Busa, gihabas ang Tax Declarations sa Shell Island ug sa Cordova ania ang sulat ni Provincial Assessor Alma P. Sibonga nga gipitsahan og May 5, 2014 ngadto sa Municipal Assessor, Cordova, Cebu.
Walay papeles ang Cebu Coliseum Complex (CCCI) nga gikuptan aron paghawid sa Shell Island. Ang CCCI buot magpatitulo sa Isla bisan kon Unclassified Public Forest kini ug busa, wala tugoti sa DENR.
Sa dihang gihatagan ni DENR Director Isabelo R. Montejo og kinsi ka adlaw ang CCCI sa pag-apply ubos sa Forest Land Use Agreement (Flag) imbis titulo, dili ang CCCI maoy mi-apply kon dili ang Cebu Commercial Complex, Inc. (CCCI usab ang abbreviation) kay kuno ang Cebu Coliseum Complex, Inc,. nagdala usab sa ngalan sa CCCI.) Ania ang sulat ni Atty. Herrero nga gipitsahan og Mayo 21, 2014 nga nag-asoy niini.
Nagpakisayod ako sa SEC kon unsa ang Cebu Commercial Complex Inc. (CCCI). Ang Security and Exchange Commission (SEC) miingon nga wala marehistro ang Cebu Commercial Complex, Inc. (CCCI) ug ang Cebu Coliseum Complex usa ra; wala magdala sa ngalan Cebu Commercial Complex Inc. (CCCI). Ania ang duha ka Certification sa SEC nga pulos gipitsahan og Hulyo 9, 2014.
Akong gisulatan si Director Montejo nga ang iyang gipaboran nga Cebu Commercial Complex Inc., (CCCI) usa diay ka unidentified flying object kay wala marehistro. Ania ang akong sulat nga pinitsahan og Hulyo 15, 2014.
Gibakwi ug giusab ni Director Montejo ang iyang gihatag nga pabor sa Cebu Coliseum ug gisalibay ang application sa Flag sa Cebu Commercial Complex Inc. (CCCI). Ang iyang kasugoan akong gisukip dinhi.
Dili masabot nganong gibantayan ang Shell Island sa mga tawo ni Frederick K.D. Ong Jr., ang isla dili iya. Ang dunot nga building nga nagbarog niini dili panimalay, bakanti ug walay negosyo. Walay building permit ug business permit.
Wala mausab ang akong kasuod ni Atty. Augusto W. Go. Utangan pa gani ko niya ug P500,000.00 walay labot sa mga pabor nga akong nadawat gikan kaniya. Apan dili nako mapasagdan ang Shell Island. Kini maoy nakapalungsod sa Cordova kaniadtong Enero 1, 1913 kay ang buhis niini maoy gibuhi sa bag-ong munisipyo. Gawas pa, wala mahasubay sa balaod ang ilang pag-angkon niini. Ako igo lang nagtamod sa balaod.
Si Atty. Go buotan, maligdong, ug law-abiding. Makasabot siya sa akong baruganan ug malipay siya niini. Gisunod ko ang prinsipyo sa UC College of Law nga iyang gitukod ug nga akoy unang Dean nga nagtudlo sa mga tinun-an sa pagtahod sa balaod. Salamat”.
Sa akong kabahin, magpaabot nalang ko nga maduso ning maong isyu sa hukmanan aron maklaro kining tanan kay si Atty. Ivan Herrero nga akong natawgan mi-insister gyud nga duna silay insaktong mga dokumento pag-claim sa Shell Island.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
