Tingali niadtong bouncer pa sa club si Pope Francis, diha tingali daghang gusto mosulod sa pwertahan sa iyang gitrabahuan apan dili makasulod kay wa silay ticket. Isip bouncer walay mahimo ang papa niadto kay igo ra man siyang mopatuman sa mando sa management. Apan karon nga siya nay boss sa tanang mga Katoliko, iyang pasudlon ang tanang gusto mosulod basta may kasudlan lang. Ug karon nga dili lang siya boss kon dili siya mismo ang pasundayag, buot niya nga makakita kaniya ang tanan, buot niya silang himamaton ug pa-apilon sa iyang tulumanon.
Mao nga midalikyat siya pakighimamat sa mga street children nga gi-atiman sa Anak Tnk nga usa ka charitable institution nga suod ni Cardinal Luis Antonio Tagle. Gi-gakos siya sa mga bata, gi-sayawan ug gi-kantahan. Wala may gahum ug impluwensya kining maong mga bata mao nga dili kini makaduol kaniya. Mao nga siya niduol kanila.
Iyang gi-atubang ang mga opisyal sa simbahan apan dili sila maoy tumong ni Pope Francis dinhi sa atong nasud. Ang tinguha ning atong Santo Papa mao ang paghimamat sa mga nagsakit tungod sa bagyong Yolanda. Ug kay ang kasagaran sa nag-antos tungod niadtong maong katalagman tua man sa Leyte, mopaingon siya ngadto. (Gani sa higayon nga gabasa kamo nianing maong lindog, ga-misa na karon siya ngadto.) Karong adlawa masayran nato kon unsay mahitabo sa Leyte inig abot ni Pope Francis.
Ug niadtong bouncer pa siya daghan tingaling mohatag niya og pabor, buot mopa-suod kaniya para makasulod silag libre. Apan gatuo ako nga kadtong buot mohaylo kaniya iyang balibaran. Sama sa iyang gibalibaran ang buot mohatag kaniya og mahalon nga chalice. Iya kining gibalibaran kay ang kang St. Pope John Paul II nga chalice mao na lay iyang gamiton. Hinuon iyang gi-ingnan ang sapian nga buot mo donar og bag-ong chalice nga salapi nga ibayad unta sa pagpahimo ning maong chalice ihatag na lang sa mga kabus.
Nahinumdom ako niadtong usa sa mga pelikula nga Indiana Jones diin ang kinabuhi ni Indiana Jones ga agad sa iyang saktong pagpili sa chalice nga gigamit ni Kristo. Wala pili-a ni Indiana Jones ang mga hinimo sa bulawan kon dili kadtong ordinaryo ug mga ginamit na og hitsura maoy iyang gipunit. Isip usa ka anthropologist nahibawo siyag unsay gigamit ug unsay giadorno lang. Nagmalampuson si Indiana Jones.
Ang pagka bouncer ni Pope Francis dakug natabang sa iyang pagka People’s Pope kay isip bantay sa agi-anan nadunggan ug nakit-an niya ang mga tao nga buot mosulod sa iyang gitrabahuan. Karon buot niyang pasudlon ang tanan para mosaksi ug moapil sa pasundayag ni Kristo. Dili siya gusto nga may magmahay tungod kay wala kini makasulod tungod sa ilang ubos nga kahimtang.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
