Hapit tanang balita karon may kalabotan sa dagat. Dili hinuon kini ikatinga kay mas dako mang bahin sa kalibutan ang tubig kay sa yuta. Mao nga gitawag kitag “The Blue Planet.”
Niabot nag 61 ang ihap sa mga nangamatay sa MV Kim Nirvana nga nalunod sa baybayaon sa Ormoc nga mopaingon unta sa Pilar.
Unya misulpot sab ang taho nga tulo ka Koreano nga mga divers ang missing sa Mactan.
Tingali ang referendum ra sa Greece maoy way kalabutan sa dagat apan sama sa Pilipinas usa kinis mga nasud nga daghag marinero.
Ug kanunay naa sa periphery sa atong hunahuna ang pagpangagaw sa China sa atong mga teritoryo sa West Philippine Sea.
Gatukod man gud silag mga isla sa parte sa dagat nga layo ras ilang baybayon. Ila gyud tingali ni nga kinaiya nga manghasi ug maghawudhawod sa dagat.
Kon mahinumdoman ang legend ni Sinbad the Sailor, gikopya sa usa ka kinapnan (niagi kini pagka-eunuch) nga admiral sa China nga si Zheng He o Simbao (depende kon asa ka lugar sa China ang motawag kaniya). Gikaingon nga duna kini siyay 217 ka mga barko ug sobras 27,000 ka mga sakop.
Apan nagkanayon ang mga Insik nga wala gyod sa ilang plano nga mangagaw og yuta ug nga trade ug negosyo maoy tumong sa mga barko ni Simbao. Naabot sa Africa ug Europe ang biyahi ning admiral nga usa ka Muslim.
Gani matod pas usa ka naval scholar sa Britain nag-una pa si Simbao og dagsa sa America kay ni Columbus.
Kabahin sa iyang mga kombate sa kadagatan (gada bayag sundang ang Sinbad sa animation) miingon ang China nga mga engkwentro lang kadto batok sa mga pirata sa Borneo ug ubang lugar sa Asia nga buot mo-ambush ug mangawat sa ilang mga kargaminto.
Apan duna pa diay mas pirata nga Insik kay ni Simbao; siya si Ching I Sao nga usa ka 26 anyos nga burikat sa Canton nga gipangasawa sa usa sa mga haring pirata sa China niadtong panahona human nasikop siya gikan sa floating casa nga iyang gitrabahoan.
Tingali mibilib sa iyang kaigmat ang iyang bana nga gihimo siyang partner niani.
Nahimong mangtas sa kadgatan ang magti-ayon ubos sa padagan ni Sao. Human sa 6 ka tuig, namatay iyang bana ug gihangyo niya ang kaliwat sa iyang bana nga siya nay mopadagan sa ilang mga barko. Iyang giminyoan ang 21 anyos nga sinaligan sa iyang bana ug gihimo niya kining lieutenant sa ilang operations.
Duna siyay 1,600 ka barko ug 70,000 ka sakop nga mga pirata, babaye ug lalake.
Ug sa South China Sea sila nanghawod. Wala gyod siya mapildi sa Emperor.
Nagpalaban na lang ang Qing dynasty sa mga British, Portuguese ug Dutch apan napakyas lang gihapon sila.
Hangtod nga mihangyo na lang ang emperor nga pasayluon siya ug dili kuhaon ang iyang mga kinawat pero paundangon na siya sa pamirata. Ug tuod man miretiro si Sao sa edad nga 35 anyos ug nabuhing maharuhay hangtod sa edad nga 69.
Nahimong kapitan sa navy ang iyang bana, nanganak siya ug nagabrig burikatan.
Mao nga bisan pag namaghot nas Hillary Clinton batok sa China di lang gihapon ta mokompyansa nila kay mao ra ni nasod nga maoy manghawod sa kadagatan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
