Wa ko mahimuot sa gibalita ni Provincial Prosecutor Pepita Jane Petralba nga wa magkadima-o ang trabaho sa kapulisan pagkuhag judicial confession kang Estelito Sasisor Recamora alyas Lito kinsa usa sa tulo ka mga panday nga responsable pagpatay ug mipasemento sa septic tank sa inahan ug anak sa Minglanilla.
Gawas nga wa magkadima-o ang trabaho sa atong kapulisan, nagkagidlay usab pag-andam sa mga dokumento.
Nagpasabot kini nga way coordination sila si Chief Inspector Richard Gadingan ug iyang mga labaw pag-andam sa kaso.
Wa gyud motabang ang taga Provincial Police Office ug ang taga Regional Police Office ngadto sa Minglanilla Police ilabina sa pagkuha og judicial confession nga importante kaayo?
Wa pa gyud maleksiyon ang atong kapulisan nining ilang mga paltos pag-andam sa mga asunto. Naniguwang nalang sa serbisyo.
Sa mga kaso nga sensitibo, kinahanglang motabang gyud unta ang Provincial ug Regional Police Office aron seguradong way palpak ug maka-secure kita og conviction sa mga salbahis.
Maglaom ko nga matul-id ug makurihi-an intawon ang judicial confession ni Recamora aron dili maglisod ang prosecution pagtaral sa iyang mga kauban nga sila si Manuel Labrador ug George Baquiran nga dagkog papel sa linoog nga krimen sa mga biktima nga sila si Virginia ug Mica Ella Sharpe.
Ang na-file nga mga kaso didto sa Talisay Regional Trial Court mao ang double murder batok sa tulo ug kasong theft batok lang kang Manuel Labrador.
Wa’y kasong rape kay wa pay resulta. Taronga intawon ninyo kining kasoha.
* * *
Wa pa gyud mailhi ang mga suspetsado ug wa pa gyu’y resulta sa imbestigasyon sa pag-ambush nilang Atty. Amelie Alegre ug Atty. Briccio Boholst ug sa ilang office staff nga si Antonio Pino?
Unsa ka tinuod nga may kasong gihawiran bahin og illegal drugs ang namatay nga abogada?
Akong tinubdan miingon nga nasuko ang kliyente nga drug personality kay hangtod karon nagpabilin kining napriso kinsa napasaligan nga mapabuhi-an sa labing dali nga panahon.
Kinahanglang apilon kini pagsubay sa atong mga otoridad.
Mangambot lang sab ko kung ang usa sa mga angulo pagpatay mao ang kabahin sa love triangle. In fairness kang Atty. Boholst, giklaro sa mga kauban sa law firm nga wa silay relasyon ni Atty. Alegre.
Kumusta man ang imbestigasyon ngadto sa bana nga si Ryan? Gibyaan na sa kapulisan ang maong anggulo?
Maglaom ko nga gitutokan gihapon sa atong kapulisan ang imbestigasyon ning maong kaso taliwa nga na-busy sila karon pag-secure sa atong mga delegado sa APEC summit.
* * *
Dili ko makabasol sa ubang mga kritiko nga moingon nga inutil ning administrasyon ni Presidente Noynoy Aquino ug ang pamunuan sa probinsiya sa Sugbo ni Governor Junjun Davide kay kining ilang gipanghambog nga 23 billion pesos nga mga infrastructure projects wa kaayo kini matagamtami sa mga kabus.
Ang nakapahimulos mao ang mga kuwartahan nga kanunay’ng maka-agi sa mga kalsada nga gipalig-on ug gipanindot sa national government paingon sa mga tourist destinations.
Dinhi sa dakbayan sa Sugbo, unsa may natampo sa Aquino administration? Duna bay gitunol ang Malacañang aron mapadali ang pagpatukod sa Cebu City Medical Center (CCMC)? Way gihatag si Aquino kay si Mayor Michael Rama kaalyado ni Vice President Jejomar Binay.
Tinuod gipaayo sa taga Department of Public Works and Highways (DPWH) ang drainage system sa Barangay Lahug duol sa karaang merkado ug duol sa JY Square, apan inay masulbad ang problema sa baha, migrabe man hinuon. Usa kini sa mga daku’ng paltos sa LP.
Sa 23 billion pesos, wa makahuna-huna ang mga alipores sa LP Cebu ngadto sa Malacañang nga tipakan ang budget aron makasugod pag-negotiate sa mga tag-iya sa yuta sa Banilad-Talamban area alang sa expropriation aron mapalapdan unta ug masulbad ang problema sa traffic?
Didto sa probinsiya, napalambo ba ni Governor Davide ang tanan natong mga district hospitals nga ultimo didto sa Argao district hospital diin lumad siyang taga didto wa man gani mapalambo?
Sa giplastada nga data sa kalihim sa DPWH, wa madetalye ang tanang proyekto nga gigastohan sa 23 billion pesos ilabina ang mga farm-to-market roads, pagpa-ayo sa mga tulay ug uban pa.
Usa sa maki-angayon nga lakang sa taga administrasyon mao nga kinahanglang ipapublikar ang tanan ug ipa-indicate ang tukmang lugar sa mga proyekto ug ang gasto.
Sa 23 billion pesos, pila ang nabulsa sa mga nagpatuman sa mga proyekto?
Segurado na si P-Noy nga wa nay kabuang ug corruption diha sa DPWH?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
