‘Abusado’ng pulis’

Nabalaka nako sa epekto niining sunod-sunod nga mga patay nga pulis ang nalambigit sa krimen.

Tinuod dunay mga insidente nga pulis ang mapatay kay magdanghag sa trabaho, apan dili sab ikalimod nga dunay mga panahon nga ang uban kanila sobra na ka “overacting” bisan sa ilang mga personal nga mga lakaw ug pag-responde sa mga krimen nga moresulta sa “overkill”.

Usahay mahimo na’ng way bili ang nalatid sa konstitusyon ang kabahin sa civilian supremacy ug mawagtang na ang ilang maximum tolerance.

Niadto lang Miyerkules sa gabii, dihay pulis nga naka-uniporme nga nag-drive sa awto nga patrol car sa Cebu Provincial Police Office kay may tatak nga CPPO nga sakop ni S/Supt. Noel Gillamac ug may kuyog nga babaye nga nakasibilyan, nga medyo na-attract sa akong tinan-awan kaniya.

Nagsugat among tinan-awan diha sa main road kay bisag nagkapuliki kaming mga motorista pasaka, mi-insister gyud siya pa left-turn sa kalsada nga nataliwad-an sa Cambridge School ug Lahug Public Market.

Dihang natandog kaha’ng garbo kay milusot ko ug wa siya maka-agi, mi-U-Turn siya ug mi-aksiyon paggukod kanako. Mao nga akong gihunungan.

Unya ang kanahan nga pulis nangamay kanako ug paduolon ko niya. Dihang miduol ko kaniya sa driver side, wa siya mo-abli kay pabalhinon ko sa akong position sa passenger side.

Mao nga nibalhin ko ug dihang nangabli siya, nagpa-ila ko niya nga sakop ko sa media ngan nga medyo init og ulo.

Dihang nangutana siya kung unsay problema nako kay “tabis kuno ko og tinan-awan kaniya” mao nga gipalit sa akong misis ang estorya ug giprangkahan sa iyang pagka-abusado nga moliko ug mopadagan gyud bisag apiki nga hapit mi magsungag.

Mao nga ang babaye niyang sakay miingon nalang nga manglakaw nalang sila.

Ang ako ba, nganong hangtod karon naa pa may mga abusadong pulis ug mga hambugero bisag kapila na mag-agi’g seminar? Nag-gara-gara to siya sa iyang sakay?

Kinsa man to iyang kuyog? Asawa o uyab? Puwede diay na’ng pasakyan og sibilyan ang patrol car bisag personal nga mga lakaw ug dili emergency?

Kung wa pa ko magpa-ila nga media ug tan-aw niya nga masayon-sayon lang, dili kaha to mamusil ug mangatarungan siya nga kami maoy mi-abuso ug mirisgo sa ilang kinabuhi?

Ang ako lang niining atong mga otoridad, pagbaton intawon mo’g respeto bisan ngadto sa kinagamyang hut-ong sa katilingban kay wa pa mawagtang ang civilian supremacy sa atong batakang balaod.

Sayang lang ning mga programa sa PNP nga mopalig-on sa maayong relasyon ngadto sa katawhan nga anaa kini’ng mga hanggaw sa organisasyon.

* * *

Happy fiesta sa tanang Casaynon bisan kadtong wa maka-uli.

Sa karaang panahon ug maoy naandan namo’ng taga Casay, Dalaguete, ang matag ikatulong Domingo sa Nobyembre maoy among bisperas ug ang Lunes maoy kahulogan sa kapistahan ni Senyor San Vicente Ferrer.

Sa miaging tuig, nahimong kontrobersiya ang among kapistahan kay daghang nangreklamo kay giusab ang adlaw sa fiesta namo nga Sabado na maoy bisperas ug ang Domingo maoy kahulogan.

Nakasabot kaayo ko sa kausaban kay lagi ang Lunes mingaw na kay daghan na’ng manguli sa Siudad nianang Domingo sa hapon kay trabaho lagi ang Lunes ug gamay nalang kaayo ang makatambong sa santos nga misa sa Lunes sa buntag.

Sukad niadto nakahukom ang presidente sa kapilya nga si Ma’am Epifania “Panie” Commendador Caruz nga magbotasyon ang Casaynon alang sa tukmang adlaw sa kasaulogan.

Ang resulta sa botasyon, midaug gyud ang ikatulong Sabado sa Nobyembre nga mao nay bisperas ug ang Domingo maoy kahulogan.

Mao nga niadtong Sabado ug kagahapon maoy fiesta sa amo sa Casay proper. Sa akong tan-aw, nindot man sab aron makapahuway gyud og tarong ang tagbalay kay sa karaan nga Domingo ang bisperas.

Kagahapon, kaming tibuok pamilya among gitiwas ang kasaulogan pinaagi sa pagkaligo sa dagat didto sa Argao Beach Club. Ang among gihimo mao sab ang gihimo sa ubang pamilya.

Magpasalamat kaayo ko og dako nila Padre Zacky Zacarias, among parish priest, kay misanong sa among imbitasyon ug kang Dr. Jose Edgar Alonso.

Bilib sab ko ni Ma’am Panie kay bisag busy gyud kaayo kay gawas maoy nagdala sa kapilya ug maoy nag-welcome sa mga delegado sa lungsod sa Liloan nga anaa gibutang sa Casay Elementary ug High School alang sa nagpadayong provincial meet, nakalahos pa gyud tawon sa among bay.

Maglaom ko nga magpabilin si Ma’am Panie sa iyang katungdanan kay dunay insaktong direksiyon ang mga kalihukan sa amo sa Casay.

Magpasalamat lang sab ko ni agaw kapitan Joseph Belamia ug tibuok konseho sa Casay kay ang among naandan nga agi-anan sa prosesyon , napa-ablihan og balik dihang nabayran ang tag-iya sa yuta.

Maglaom ko nga sa sunod fiesta puhon, masemento na gyud ang among agi-anan sa prosesyon ug mapalapdan na ang kalsada.