Political parallels

By: Gerard Pareja February 12,2016 - 09:48 PM

Political parallels

Salins Hulbot

Gayagaya puto maya, matud pas mga Tagalog. Dihay usa ka manunulat niadto nga nakurat kon nganong nalingaw kuno kaayo kitang mga Pinoy sa pelikulang “Forrest Gump” nga ang dakong appeal niadto mao man ang pagtuhog sa American culture sa nagkalainlaing dekada. Sa akong bahin, wala ra ako nakurat niadto kay mga 70 percent tingali sa Pinoy culture salin man sa mga Kano. Ang atong presidential system, pananglitan, maura mag ahat nga version sa ilaha. Ug kon maobserbahan mo, daw parehas ang blueprint sa atong mga presidential aspirants sa ilaha.

The gun slingers. Unahon ta si Trump ug Duterte. Puros sila barumbado ug himalikas. Puros sila may “shotgun solution” nga ilang iwarawara batok sa mga problema sa nasod. Puros sila popular sa masa. Tough guy outsider out to reform the system ang ilang drama. Bilyonaryo si Trump apan wala pay record sa serbisyo.

Ang iya hinuong ipanghambog nga daghan siyag negosyo nga napadagan, ug nga mao usab kini iyang himuon sa gobyerno. Si Duterte kanunay nga mopasigarbo sa iyang pagpaminus sa krimen sa iyang dakbayan sa Davao.

The rookies. Dayon isunod ta si Grace Poe ug Marco Rubio. Puros mga bag-ong senador ang duha ug puros maayo manulti ug puros general themes ang ilang batbaton; dili kaayo sila particular. Ang ilang appeal naa sa ilang pagka bag-o sa politika. Puros usab buot mopuli sa mga presidente nga sama kanila, wala usab kaayoy executive branch experience.

The sly hands. Unya isunod ta si Clinton ug Binay. Puros sila Scorpio, puros sapian, puros maru ug puros lisud probahan ang giingon nga ilang mga kasaypanan.

Dugay nang gigukod sa senado si Binay ug kanunay na nga gibombahan sa Fox News si Clinton, apan daw wa gyud matay-og ang duha. Puros sila mga poste sa existing political system kay nangaraan na man sila. Ganahan ra kong maminaw sa mga diskurso ni Clinton, apan alang sa mga Amerikano, uninspiring ang iyang mga rally. Ug kon uninspiring alang sa mga Kano si Clinton, mas boring sa mga Pinoy si Binay. Silang duha ang may pinakalig-ong politikanhong makinarya sa ilang mga pwesto nga gidaganan.

The sweepers. Duna usay parallel si Roxas ug Bush. Puros sila mainstream bets nga nangamote sa survey. Puros sila “don’t rock the boat dancers.” Status quo champions nga nagtakiang. Dili pa ni sila out but not quite in.

The three pointers. Sanders and Santiago. Of course Sanders can still pull a surprise, pero pagsugod, gituohang binlod ra siya. Sama kang Miriam, usa siya ka elderly figure nga paborito sa mga college kids. Granny appeal, so to speak. Puros baya kita ganahan mosabak niadto sa atong mga lolo para maminaw sa ilang isturbot.

Mas dihado si Miriam kon itandi ni Sanders; murag  dili kaayo epiktibo ang iyang pick-up lines. Dili ingon ka lanug sa “feel the Bern!”

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: Donal Trump, Fox News, Mayor Rodrigo Duterte, sandiego, Santiago

We use cookies to ensure you get the best experience on our website. By continuing, you are agreeing to our use of cookies. To find out more, please click this link.