Salins Hulbot
Killer, barumbado, himalikas, himabaye. Kini ang kanunay tang madunggan kabahin ni Duterte mao nga duna kitay imahen kaniya nga usa ka berdugo. Tungod niini daghan ang ga-atang nga moguwa ang berdugo sa unang presidential debate didto gihimo sa Cagayan de Oro ug nga punggutan niya og ulo ang iyang mga karibal sa lumba.
Apan, surprise! Si Digong kahibawo man sad diay mo pa cute. Ug tungod niani 120k ang hits ni Duterte sa Twitter paghuman sa debate. Gisundan siya ni Binay nga 67k.
Dayon ni Poe ug ni Miriam Santiago nga dunay 32k ug 31k. As expected nangiwit nasad si Mr. Tuwid na daan. Nakakuha lag 27K si Mar Roxas.
Samtang sa Facebook si Digong say nanguna sa “love” emoticon ug si Roxas ang nanghawd sa “hate” nga emoticon. Usa sa rason niini mao nga sa Mindanao man gud na sentro ang maong debate ug ang kakuwang sa mga infrastructure didto maoy hinungdan nga daghang galagut sa administrasyon nga si Roxas ang kandidato.
Apan dili lang ang kalagot sa mga tao sa administrasyon ug ang ilang kahiubos sa NCR maoy nakapa popular ni Duterte. Wa sila mahibawo nga kamao diay modala og pinakalma kinis Digong. Tungod lagi kay kanunay mang gi-sibya nga “kamayng bakal” sa pagpadagan sa dakbayan sa Davao nakalimot ta nga usa siya ka politiko. Ug walay politiko nga molahutay kon wala kini karisma.
Kon wa kay gidapigan, ug wala kay issue nga nahibaw-an ning lima ka kandidato sa entablado makit-an mo dayon nga si Duterte ang pina ka charismatic kanila. Si Poe ug si Roxas ang pinaka articulate.
Silang duha ang pinaka-maayo manulti. Apan si Roxas, sama kang Binay zero charisma usab. Ang bureaucracy ug ang grassroots organization maoy nakapalig-on ni Binay.
Daw ni kalma silang lima ning maong panagtigum. Kon ang uban gahuwat kon kanus-a balikason ni Duterte ang iyang mga kontra diha usay mga gahuwat kon kanus-a mangasaba si Miriam o di ba kaha hinuon mohatag kinig “hugot” lines. Apan wala usab kini mahitabo.
Hinuon primero pa man kining debate. Dunay purohan nga mag insultohay pa kini sila sa mga mosunod nilang panagtagbo. Anhi sa atong dakbayan ang ikaduhang debate ug ang TV5 maoy mosibya niani. Sa Abril ang katapusang debate ug adto kini himuon sa NCR ug ang ABS-CBN na maoy mopahigayon niani. Ang GMA7 maoy ni cover sa debate niadtong Sabado sa Cagayan de Oro.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
