Super Hirit
Asa man intawon ang atong mga tinugyanan sa panglawas nga mao ang taga Department of Health (DOH-7) ug ang taga Cebu City Health nga wa man sila makabadlong ug wa gani makapagawas og mga pahimangno sa mga tawo nga nangaligo sa hugaw kaayo nga baybayon sa South Road Properties duol sa Malacañang sa Sugbo niadtong Domingo (Easter Sunday)?
Kung grabe ka hugaw ang mga beach resorts diha sa Lapu-Lapu basi sa findings sa taga Environmental Management Bureau (EMB), mas labaw nang hugaw ug dunay grabeng kagaw ang atong kabaybayon diha sa SRP.
Dili gyud ikalimod nga puwerte’ng hugawa diha sa SRP ug sa mga baybayon dinhi sa dakbayan sa Sugbo kay gawas nga naay daghang basura sa ilawom sa dagat nga lapaw pa sa tawo, anha pa tugpa ang mga hugaw nga tubig gikan sa kasapaan ug mga kanal.
Gawas niini, baga kaayo ang mga residente diha sa Ermita nga adto ilabay ang ilang mga hugaw sa dagat.
Kining kagaw sa basura dili ra ba gyud madala bisag unsa ka lig-on sa atong immune system.
Maglaom ko nga pangitaan og solusyon sa gobyerno nga mapatay ang kagaw sa atong kabaybayonan aron atong kapahimuslan pagbalik ang kalimpiyo ug katin-aw sa dagat.
Seryoso ba ang atong mga politiko pag-preserbar sa kalikupan?
* * *
Naalarma ko sa gipagawas nga estorya ni Dr. Rene Obra, head sa Center for Behavioral Sciences sa Vicente Sotto Memorial Medical Center (VSMMC), nga ang Sugbo maoy may labing daghang kaso sa suicide incidents.
Ambot kung nakatampo ba kami’ng mga sakop sa media niining maong gidaghanon? Kay sa tinuod lang, inig balita namo nga dunay naghikog-patay, pagkataud-taod duna say magkutlo.
Mao man gani nga mismo ang among taga TV sa GMA-7 dili na mobalita parte sa hikog-hikog.
Si Dr. Obra nga nahimong usa sa mga guests sa akong programang “Dialogue On The Air” sa DYSS Super Radyo kaniadto, mipasabot nga daghang rason nga magpakamatay ang tawo.
Una, ang grabeng depression tungod sa problema nga kuwang sa suporta sa pamilya ug mga kauban sa kinabuhi.
Ikaduha, kadtong mapakyas sa gugma nga nakatagamtam og grabeng kaulaw.
Ikatulo, kadtong na-attached na pag-ayo sa grupo ug na brainwashed na pag-ayo hangtod nga mosugot na lang sa bisan unsay isugo.
Ika-upat, dunay mga klase sa tawo nga kulang sa pansin nga gusto lang gyud mosuway paghikog aron mosikat.
Kining tanan puwedeng malikayan kung masilsil lang gyud sa alimpatakan sa katawhan nga dili kita maoy tag-iya sa atong lawas ug dako kita’g tulubagon sa Diyos kung atong unayon pagkutlo kining hinuwaman nga kinabuhi.
Alang lagi nako, way maayong laki nga psychiatrist ug psychologist nga makapaayo sa dagan sa panghuna-huna sa tawo kay daghan sab sa ilang han-ay nga naghikog sab.
Ang ato ra’ng kaugalingon maoy makatabang mismo kanato. Di ba?
* * *
Traffic na sab kaayo kay ipadayon karong Abril 2, adlaw’ng Sabado, ang pag-ayo sa karaang tulay sa Mandaue-Mactan.
Maayo unta nga dili na mausab ug maoy matuman ang gisaad ni Director Ador Canlas sa Department of Public Works and Highways (DPWH-7) nga ang usa ra ka lane maoy sirad-an unya ang pag-sirado himoon gikan sa alas 9 sa gabii hangtud sa alas 6 sa buntag.
Unsaon na lang kung ipa total closure unya 24/7 pa? Dili kalikayan nga moabot niining puntoha kay alangan inig buhos og semento sa kontraktor, ato gihapong pauyogon ang taytayan?
Ang ako-a, kinahanglang mag-antos kitang tanan sa traffic kay inig ka ayo sa tulay, mabulahan naman sab kita.
Maglaom ko nga dili ipamulitika sa administrasyon ang pag-ayo sa karaang tulay nga sila maoy mayawyawan sa wrong timing kay nagkaduol na ang eleksiyon.
Puslan man nga nasugdan, tiwason ang proyekto. Ang mga botante makasabot ra na sa umaabot nga kaayohan.
Limpiyo man kaha inyong konsensiya ug wa madato sa komisyon? Hala focus mo diha uy!
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
