Wa ko mabalaka nga apilon ni President-elect Rodrigo Duterte sa iyang death list ang mga corrupt nga sakop sa media, kana kung naa gyud.
Ipaklaro lang sab kung corrupt ba gyud ang ilang mapatay kay kung di, basig mao na na’ng panahuna nga dunay laing people power nga maumol batok sa iyang pamunuan.
Nganong mahadlok man gud ta mamatay nga kabahin man sa kinabuhi ang kamatayon ug kita’ng tanan paingon man sab didto?
Prangka lang sab nga pagka-estorya vulnerable man gyud kami’ng mga sakop sa media sa extra- judicial killing.
Apan sa dili pa niya pahukman sa iyang mga assassins kinahanglang subayon pagtarong kung kurakot ba gyud ang target pinaagi sa life style check.
Sayop man gyud ang giingon ni Duterte nga mapatay lang ang media kung kurakot kay daghang mga kaubanan namo nga gipang-patay gumikan sa kawsa sa tinarong.
Mahug na ba nga kurakot ang media practitioner nga mo-expose sa mga pangurakot ug abuso sa taga gobyerno?
Kurakot na ba ang pagtan-aw sa mga naglingkod sa gobyerno sa broadcast ug print journalist nga critical sa ilang administrasyon?
Media corruption na ba na kung ang gimantala o gisibya midayeg sa news source?
Dili sa ingon nga nagnilimpiyo kami’ng mga tarong nga anaa mainstream media, apan akong tan-aw mas maayo nalang nga dunay mga abusado namo’ng kauban nga nakigbatok sa corruption sa kagamhanan.
Apan taliwa niining mga halang nga pulong ni Duterte ngadto namo’ng mga sakop sa media apan ako nagtoo nga mausab na siya ug ma-professional na ang iyang pag-tratar sa mga mo-cover kaniya inig sugod sa katungdanan karong petsa 30.
Wa siya pili-a sa katawhan aron tudlo-an og binastos ang next generation.
* * *
Kung tinuud man nga salvaging o rubout ang pagpamusil-patay sa mga police operatives ngadto nila ni Rowen Secretaria alyas “Yawa”, John Jason Montes ug sa laing usa didto isla sa Banacon Getafe Bohol, apan nganong hangtod karon, wa man mo-cooperate sa taga Commission on Human Rights (CHR-7) ang pamilya ni Secretaria?
Nagpasabot ba nga konbinsido ang mga sakop sa pamilya ni Secretaria nga legitimate kadtong police operations?
Niadtong Sabado sa hapon, atol sa among programa’ng “Dialogue On The Air” sa DYSS Super Radyo, gibutyag ni CHR-7 Special Investigator 3 Leo Villarino nga wa gyud mosanong ang pamilya ni Secretaria ug sa laing napatay nga ipa-autopsy.
Bugtong si Susan Montes lang nga inahan ni John Jason maoy vocal ug maoy pormal nga mireklamo sa CHR.
Karong adlawa mangabot ang mga forensic experts gikan sa CHR Manila aron mo-autopsy sa patay’ng lawas ni Montes.
Apan unsa may resulta sa paraffin test sa mga kamot ni Secretaria?
Kung positive nga may gun powder residue, ang presumption mao nga shoot-out o pinusilay gyud ug dili rubout.
Atong ibutang nga way labot si Montes ug atong ibutang nga ma-negative siya sa paraffin test, apan positive si Secretaria, may rason gihapon ang kapolisan pagpatay kang Montes ngan nakigpinusilay ang ilang amo ngadto sa kapolisan.
Pero ang nakanindot karon mao nga estudyuhan sa taga CHR nga mohimo sila’g rekomendasyon ngadto sa Ombudsman nga pa-imbistigahan si Mayor-elect Tommy Osmeña sa posibleng kalapasan sa Code of Conduct and Ethical Standards for Public Officials and Employees tungod sa iyang pagsuporta sa vigilantes style-killing ug paghatag sa kapolisan og cash reward nga makapatay sa mga criminal ug mga drug personalities.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
