CEBU CITY, Philippines — Patay ang usa ka mekaniko ug motor human gi banhigan karong hapon didto sa dalan A. Del Rosario, Barangay Mantuyong, sakop sa dakbayan sa Mandaue.
Ang napatay gi ila sa mga awtoridad nga si James Michael Remulta, 32 ang edad ug molopyo sa Barangay Alang Alang sa dakbayan sa Mandaue.
Si Po1 James Branzuela, ang nag hawid sa maong kaso, ning butyag sa CDN Digital nga pasado alas dos sa hapon karong adlawa, Marso 9, usa ka armadong tawo kalit nga mi sulod sa gate sa bakanteng lote nga gihimong ayohanan ug motor, gi duol si Remulta ug walay langan gipusil ang maong biktima sa pipila ka higayon.
Si Branzuela nagkanayon nga wala pay matumbok kong kinsa ang ning pusil patay sa maong biktima.
Ang kapulisan mo susi usab sa mga CCTV (closed-circuit television) camera sa dapit aron masuta kung kinsa ang mamumuno.
Ang Scene of Crime Operatives (Soco) sa Mandaue City Police Office naka kaplag sa crime scene ug katorse (14) ka mga kabhang sa bala, lima niini nag gikan sa kalibre 45 nga armas.
Ang kapulisan gi imbestigahan ang posibilidad nga ang pagpatay may kalambigitan sa ginadiling druga human mi angkon ang kapuyo ni Remulta nga si Angelie Cabilin nga namaligya ug mo gamit ug shabu ang iyang kapuyo kaniadto apan wala kini mahibalo kung nibalik si Remulta sa iyang bisyo.
Nahibaw-an usab nga si Remulta na priso kaniadto sa kaso nga pag pagpanulis o robbery ug kasamtangang nag atubang sa kaso nga may kalambigitan sa illegal nga druga. Gani kagahapon lang, petsa 8 sa Marso, ning tambong pa si Remulta sa hearing sa iyang kaso./elb
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
