Gubot pas lukot ang Apas

Haskang datoa  na gyud  unta  sa akong amigo nga si Apas  barangay  captain Ramil  Ayuman kun midawat  pa  sa  tanyag  ni Madam Aletha Magat  Suico  aron lang  mapahawa ang mga  nagpuyo sa  sitio  San Miguel,  Apas nga  subject  karon  sa  dakong  buruka.

Si  Ramil nga  mitunga  sa among  sibyaanan  kagahapon  sa  dySS Super  Radyo uban sa  mga  leaders sa mga  molupyo  hugtanon  sa   iyang  akusasyon  nga  miingon  gyud  kaniya  si Aletha kaniadto nga  dunay  P6 million nga budget  sa  pagpahawa  sa mga nagpuyo.

Miingon usab ang  kapitan nga giingnan  siya  ni Aletha nga puwedeng  maiya  ang P2 million to P4 million unya ang uban adto  na sa mga residenteng apektado.

Apan  ang version  sa ginang  uban sa  ilang abogado  nga si  Mark  Gaviola  niadtong Lunes miklaro nga  wa sila  mo-offer sa  kapitan  og  igo  ra  nilang  giingnan nga  dunay P6  million nga budget  alang  sa  boluntaryong  pagpahawa.

Ako  nagtuo nga tipik  na  kadto  sa strategy ni  Aletha  aron  paghaylo  sa  kapitan.  Pero  pasalamat  ko ni  Ramil nga  wa  masilaw  sa dakong  kuwarta nga  gitanyag.

Kinahanglang  ipadayon ni  kapitan Ramil  ug sa  konseho  sa  Apas  ang  pagpakigbatok  sa  giingong  mga  sindikato  nga  buot  mangilog og  mga  lote.

Dili ikalimod nga  ang  Apas karon  usa na ka sentro  sa  patigayon  dinhi sa dakbayan  sa  Sugbo.

Ang  akong  gikabalak-an nga ang mga  klarong  province-owned lot  nga anaa  luyo sa among complex  sa  GMA  mapanag-iya  na  og  mga dagkong  negosyante nga  tipik  ug kabahin  sa sindikato.

* * *

Akoy  naluoy  sa  usa  sa  mga  sakop ni Raquel Bohol Arce  sa Probe kon Prevention Restoration Order Beautification and Enhancement   nga si  Ruel  Tabasa  kay  gitabangan  og  kulata sa  mga Muslim nga  naninda sa sidewalk  diha  sa Leon Kilat niadtong  Sabado.

Sa  kadaghang  mitabang  pagkulata  ni  Tabasa, tulo ray  nadakpan ug  gipasakaan  og  mga  kaso  nga sila si Ibrahim Panaudan, Rasheed Hadjirasul  ug  Salic Malawi.

Si  Arce  nga  akong  na-interview,  mikondenar  gyud  sa  gihimo  sa  mga  negosyanteng Muslim kay igo  ra  silang nagtuman  sa  ilang trabaho  sa  pagpahigayon og  clearing  operations sa  kadalanan.

Sa  tinuod  lang  gyud, buhi  kaayo  ang negosyo  dihang  dapita  inig  dayong  salop  sa adlaw  kay  maglumba  na  paghiklad  ang mga  igsoon  natong mga Muslim sa mga second hand nga  mga  cellular  phones nga gituhoang mga  kinawat.

Gani,  dihay  customer  kaniadto nga  gitabangan og  kulata  dihang  iyang  giangkon  ang usa  sa  mga  display  nga  unit  nga  iyaha  human  gilabni.
Niadtong  Sabado, moabot ug  70  ka  mga  units  ang  nasakmit  nilang  Arce ug  iyang  gipasabot  nga  dili  gyud  niya  iuli  sa mga  nagtinda kay  tipik  kini  sa  ilang  ebidensiya  sa  mga kaso nga  ilang  gipasaka.

Ang  nakaporke  pa gyud  kay  ang sakop  ni  Arce  nga si Tabasa, gawas nga gikulata  gikuha  pa  gyud  sa  mga Muslim  ang  issued UHF radio, belt bag nga  may  sulod  nga cellular  phone  ug pitaka  nga  may sud nga dul-an P5 mil.

Pero  in  fairness  sa  tulo ka mga  dinakpan nga ang  usa  kanila  nga nangangkon nga  pag-umangkon ni Regional Trial Court Judge Macaundas Hadjirasul, midepensa nga wa  gyud  silay  labot  sa lamok-lamok niadtong  Sabado.

Matud pa, igo ra silang nangusyoso niadtong higayuna  sa  kagubot.  Apan  sila si  Arce hugtanon  gyud  sa  ilang  alegasyon batok sa tulo.
Sunod patabang tawon mog pulis aron dili mamiligro inyong kinabuhi.

* * *

Magbantay-bantay kita karon kay milihok  na sab ang mga sindikato. Gawas  nga  gibalik-balikan  ang LBC  pagtulis,  dunay  mga palusot sa  peke  nga  kuwarta,  ug  karong  bag-o,  dunay  fake nga  mga  gold bars.

Bahin  sa  mga  peke  nga mga bulawan,   usa  ka  abogado nga  nag-base  sa Metro Manila   ang  uwahing  biktima karong  bag-o.

Ang  biktima  mao si  Manuel Santos ug  kauban  niyang  business  partner   nga  si  Virginia  Barruffol.

Sa  pito  ka mga  sakop  sa  sindikato  sa  palusot  sa fake  gold bars,  upat  ang  nadakpan sa  Criminal Investigation and  Detection Group in Central Visayas kon CIDG-7 atol  sa entrapment  operation niadtong  Biyernes,  March 7 sa  may  Sunburst Restaurant, Mango  Avenue.

Ang mga  nadakpan  ug  gipang-inquest  niadtong Lunes  sa hapon mao sila si William Ebcay Estrella taga Poblacion Toledo, Rex Dy Divinagracia  taga  Bogo  City,  Everett Ybañez Olayvar, taga-Poblacion Toledo ug Soledad Dy Divinagracia taga-P. Del  Rosario ning  ciudad.

Ang  kauban  sa  grupo  nga wa  madakpi  mao  sila si Ma. Carla  Santos, dunay  alias Sunny o Rey  ug dunay  wa  pa gyud  mailhi.
Ang mga  dinakpan  gipang-asistahan  sa  ilang mga abogado  ug  ni-waiver   sila  kay  buot  nilang tubagon  ang  kaso.

Sa  reklamo  ni  Santos,  siya miingon nga  grabe  gyud  kaayo  ang  diskarte sa pundok aron siya makabayad sa mga pasiunang  transaction.

Aron gyud siya makatuo nga genuine ug mapugos pag-anhi sa  Sugbo gipletihan pa siya  sa eroplano ug libreng accommodation  hangtud nga mi-contact sab siya og dakong buyer  kay 50 ka mga gold bars ang  giingong  ibaligya.

Apan dihang migawas ang  resulta  sa  unang  gold bar  nga  “fake,”  wa gyud siya magsaba-saba hangtud ang pundok mitanyag nga  mo-down  sila  og  P5  million sa P10 million kapin nga kantidad sa giingong  mga bulawan.

Mao nga midangop sila sa  CIDG-7  ug  milampos  sa entrapment  operation  apan nakasibat  ang tulo.

Daghan na  kaayong  istorya  parte  niining mga  fake nga  gold bars apan kining mga sindikato maayo gyud kaayong mangita og paagi aron  lang  makailad sa ilang mga  prospective buyers.