Sakuban

Kagahapon nakit-an ko sa programa ni Jessica Soho sa TV ang ilang pasiaw nga taho kabahin sa tuli. Murag apil kini sa ilang mga summer stories. Summer man gud ang timpo sa pag panuli.

Ilang gitawag kining pag-abri sa panit nga nagputos sa kinatao sa lalaki nga rite of passage. Ingnon ta lang nga abri kay lainain man ang pamaagi sa pagpaguwa sa ulo sa kinatao gikan sa putos niani. Dunay uban nga gisian lang ang tumoy samatang dunay uban nga guntingan ang panit sa tumoy.

Gika-ingon nga ang kining maong paghiwa walay medical benefits. (Duna hinuoy pipila ka mo sugyot nga duna kiniy matabang sa hygiene o sa paglimpyo sa kaugalingon.) Ug nga tungod niani maingon nga religious ug cultural ra ang value niani.

Kini gung maong aktibidad gasugod man sa middle east mao nga duna kini kalabutan sa relihiyon. Daghang relihiyon nga misugyot nga kinahanglan kining himuon sa mga lalake nila nga sakop.

Sa ato nahimo kining rite of passage nga kinahanglang agi-an sa mga batang lalake paingon sa pagka hamtong. Walay tuli sa ato para sa mga babae. Sa ubang lugar sama sa Africa dunay tuli sa babae apan supak ang ubang nasud niani ug nangusog sila nga ma-undang na kini.

Kay kon ang pagtuli sa lalaki daw go signal na sa biga kay sa pag tangkas o paglaslas sa sakuban daw gi-abrihan man ang bintana nga makagawas ang kinatao sa lalake, ang tuli sa babaye nga gihimo sa ubang nasud daw kontra biga. Ang pagtuli sa babae didto nga naglakop sa pag tangtang sa clitoris ug ubang bahin sa labia gihimo nila aron dili na lamian sa pakighilawas ang mga babaye ug nga sa ingon masumpa na ang ilang biga.

Sa ato hinuon ang coming of age o “rite of passage” para sa mga babaye mao man ang paghatag nila og debut party. Tingali alang sa mga katilingban nga wala malisang sa gahum sa biga, dili na kinahanglan nga may usbon pa sa lawas sa babaye kay natural man kining ma usab kon reglahon na siya.

Lain-lain ang klase sa rite of passage para sa mga lalake sa lain-lain nga katilingban. Dunay mga tribo sa Africa diin bitayon silang magtuwad ug ipapa-ak sa hulmigas. Duna say tribo sa tunga sa Luzon sa una nga gitawag sa mga langyaw og headhunters. Para mahimong hamtong ang batang lalake kinahanglan nga makapatay siya ug madala niya ang ulo sa iyang gipatay ngadto sa ila.