Puwera gaba gyud intawon ang problema sa traffic niadtong Biyernes diha sa lungsod sa Minglanilla ug dakbayan sa Naga.
Akong mga pag-umangkon nga niuli sa Dalaguete naabtan og tulo (3) ka oras diha sa Minglanilla ug Naga. Nangapasmo gyud intawon kay hapit na alas onse sa gabii naabot ug nakapanihapon.
Inay duha (2) ra ka oras ang biyahe gikan dinhi sa Siudad paingon didto, apan hapit gyud molanat og unom (6) ka oras. Paet gyud.
Kinahanglang manubag gyud ug pangkasohan ang mga responsable sa pagkarambola sa lima ka mga sakyanan nga maoy hinungdan sa grabeng traffic.
Ang nakaporke pa gyud kay pagka pasado alas otso sa gabii niadtong Biyernes, dunay laing disgrasya sa samang dapit sumala pa ni PO1 Alden Traya.
Sa initial investigation sa kapolisan, wa gyud matuman ang speed limit kay kusog kaayong nagpadagan.
Leksiyon kini sa atong mga ahensiya sa gobyerno nga mag-off and on pagpatuman sa mga lagda sa trapiko.
Sagad sa hinungdan sa disgrasya sa kadalanan mao gyud ang human error ilabina kung drug addict ang magmaniho o ba kaha palahubog, way insaktong katulog ug mag-drive nga nagbitbit ug daku’ng problema.
Alang lagi nako, kinahanglang ibalik sa taga Land Transportation Office (LTO) ang ilang road side drug test batok sa mga driver kay daghan kanila ang wa katugpa.
Maglaum sab ko nga duna gyu’y actual inspection sa mga sakyanan sa bisan unsang orasa nga himuon sa taga LTO aron masuta ang road worthiness sa mga magbiyahe.
* * *
Nalingaw ko sa akong nadawat nga impormasyon gikan sa taga Barangay Lahug ning dakbayan nga puwerte’ng gamaya ra gyud sa mga nanambong sa gipatawag nga pulong-pulong nila ni Cebu City Councilor Mary Ann Delos Santos, kanhi City Mayor Tomas Osmeña ug ka-grupo sa Bando Osmeña-Pundok Kauswagan (BO-PK) niadtong Biyernes sa gabii.
Sumala pa, gisapot si konsehal Delos Santos nga wa makaabot og 20 ka tawo ang mitunga sa pulong-pulong sanglit ang venue diha pa gyud sa Lahug Public Market nga bailiwick ni Mary Ann.
Nagpasabot ba kini nga wa nay karisma sa politika si konsehal Delos Santos ngan nga lumad siya’ng taga Lahug ug nahimong kapitan?
O ba kaha dili gyud makabig ni konsehal Delos Santos ang taga Lahug?
Kaniadto nakadawat sab ko’g impormasyon sa habig nilang Mayor Michael Rama nga napulo (10) ra ka tawo ang manambong sa pulong-pulong sa mga barangay nga dili nila kaalyado sa Team Rama.
Apan lahi ni’ng sa Lahug kay kaniadtu kung asa si konsehal Delos Santos mosunod gyud kaniya ang mga botante ilabina ang mga senior citizens. Pero karon mamikat ang mga edaran.
Nganong naingon ani man ang kamada diha sa Lahug nga di man gyud solid ni Mary Ann ug ni Tomas?
Ma-consider na gyud nga mga wise voters ang taga Lahug nga di na magpagawong ni Mary Ann?
* * *
Ngan nga usa ka continuing offense ang kasong kidnapping, puwede’ng dakpon sa kapolisan ang langyaw nga gitohoan nga nipatay ug nisunog sa laing langyaw sulod sa Toyota RAV 4 sa Lower Busay samtang dili pa makompirmar ang identity sa biktima.
Alang nako mas maayong unhan sa kapolisan ug sa nagpaila’ng asawa sa biktima nga nipatim-aw nga si Jocelyn Wilson pag-pursue nga gi-kidnap si Timothy Wilson.
Abir, kung tinuod nga naglihok ang kapolisan, asa man karon ang whereabouts sa suspetsado nga si Craeg Keith Ratcliff?
Kung seryoso ang kapolisan pagsulbad sa krimen, nganong dili man dakpon si Ratcliff?
Way naka-ako sa kapolisan pagdakop sa langyaw kay impluwensiyado?
Kung bisdak pa ni, hagbay ra ning gitanggong ug gilapas ang mga tawhanong katungod?
May special treatment ang kapolisan kang Ratcliff?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
