Wa ko’y pagsupak niining cash reward system ni Mayor-elect Tommy Osmeña nga manghatag og tag 50 mil pesos sa kapolisan, tanod o bisan sa mga sibilyan nga makapatay sa mga sagbot sa katilingban.
Ang angay’ng hiposon kadtong dili na gyud madala bisag unsaon pagtambag.
Maayo man gani nga maka-avail ang mga pulis sa kalungsuran niining cash incentives kung ang napatay nga tulisan o drug personality naka-operate dinhi sa dakbayan sa Sugbo.
With all due respect, ngadto kang Commission on Human Rights-7 Director Arvin Odron nga supak sa summary execution, kutob ra gyud ni sila sa pagpadayag nga ilang katungdanan ang pagprotihir sa basic constitutional rights sa mga badlungon.
Nalimot ni’ng taga CHR ug taga Simbahan nga kita’ng mga inosente’ng tawo may katungod sab nga mo-protihir ug mo-preserbar sa atong kinabuhi.
Sa panahon nga manulis ug mopatay kining mga kanahan sa ilang biktimahon, naghuna-huna ba gud ni sila nga makalolooy kaayo ang gibyaan nga pamilya sa ilang gipangbiktima?
Duna bay taga CHR nga nagtan-aw sa katungod sa mga biktima?
Kapoy na kaayo nga ipa-agi sa korte ang pagsilot niining mga kanahan kay dugay kaayo mo-irog ang hustisya.
* * *
Kung problema kaayo sa traffic sa Mandaue ug Lapu-lapu, grabe sab sa lungsod sa Minglanilla.
Buot huna-hunaon makasabot pa ko nga mag- traffic sa Lapu-lapu ug Mandaue tungod kay nagpadayon ang pag-ayo sa karaang taytayan.
Pero sa Minglanilla, wa gyu’y rason nga mabara ang mga sakyanan kay lapad na kaayo ang kalsada.
Nagpakita lang nga way maayong liderato diha sa lungsod sa Minglanilla.
Usa sa nakatampo sa problema mao ang ilang mga traffic lights nga tag-as ra kaayo ang mga segundos nga magpa-abot ang mga sakyanan nga nagsubay sa national highway.
Kaniadto nga way traffic lights, hanoy ra man ang dagan namo nga paingon sa Southern Cebu ilabina sa amo sa Dalaguete.
Ambot kung unsay lakang ni Mayor Lani Peña ni-anang ilang traffic lights nga mo-abot og tag 200 segundos.
Inutil sab kaayo ang iyang liderato diha kay wa maka-desiplina sa mga tag-iya nianang mga sakyanan nga nag-parking sa national road ug ingon man sa mga abusado nga mga tricycle driver ug mga habal-habal driver.
Naa pay kongresista Samsam Gullas nga wa sab magpakabana ning maong problema diha kay nagsige nalang og duwa’g basketball.
Maglaum ko nga makatabang pagsulbad niini si governor Junjun Davide ingon man ang kapolisan ug si DPWH-7 Director Ador Canlas.
* * *
Segurado ko nga manghilam-os sa mga pagsaway ang taga Department of Education (DepEd) karong Hunyo 13 atul sa tingbukas sa klase kay magsugwak gyud ang mga tinun-an sa mga public schools tungod kay magsugod na ang K-12 program.
Tiaw muna, 52 pa ka mga classrooms ang nahuman sa 318 nga target dinhi sa dakbayan sa Sugbo nga alang sa senior high school.
Pero in fairness, mas maayong ipadayon ang K-12 bahalag adto magklase ilawom sa mangga.
Puwede kaayo’ng gamitong classroom ang mga gym ug principal office.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
