Nakugang na lang ko sa akong kasayuran niadtong miaging semana dihang nadakpan sa mga guwardiya sa Kapitolyo ang process server ni Cebu City Prosecutor Liceria Lofranco Rabillas nga si Carlo Labra Algarme nga giingong nanglungkab sa laboratory building sa IPHO-Capitol unya nakabit-bit og central processing unit (CPU) sa usa ka computer.
Nahibaw-an nga misulod si Carlo sa Capitol compound kinsa nananghid sa mga guwardiya sa Kapitolyo nga manguha lang og “kaka” niadtong Miyerkules sa kadlawon.
Pero unsang pagka-unsaa nga marka (CPU) man ang iyang gidakop.
Nasorpresa ko kay kini siya giila nga tarong nga trabahante sa gobyerno.
Gani wa ko motoo kaniadto sa mga guwardiya sa karaang building sa Palace of Justice nga si Carlo maoy responsable sa mga lungkab ug kawat sa mga ebedensiya sa lain-laing mga korte kay maoy permeng makit-an sa second floor ug third floor.
Sa bag-ong kaso, gibuhian siya sa Fuente Police Station kay dili intresado ang representante sa Kapitolyo nga si Hilson Cabillo pagkihag robbery (lungkab) sumaa pa ni PO3 Carlo Balasoto.
Akong nakita nga kawang ang effort sa guwardiya sa Tactical Security Agency nga si Dennis Guden pagdakop kang Algarme.
Ambot lang sab kung may kasayuran ba si Governor Junjun Davide.
Kung nakaabot man, wa kaha kini gi-settle kay usa sa iyaan niini usa ka huwes samtang ang ig-agaw niini dakung opisyal sa PNP?
Unsa may action nilang City Prosecutor Rabillas ug Regional State Prosecutor Fernando Gubalane batok sa process server? Pasagdan lang ni bisag nakahilabot na ug di na katoltol sa iyang trabaho?
* * *
Posible baya nga gibawsan lang ni confessed drug lord Franz Sabalones sila si Superintendents Rex Derilo, George Ylanan ug Renato Manatad.
Posible sab nga susama ang nahi-aguman ni outgoing Cebu Provincial Police Director S/Supt. Jose Macanas nga gilambigit rong bag-o sa mga Espinosa nga protector kini kang Kerwin.
Apan in fairness sa mga drug lords, posible sab nga nagtug-an sila sa matuod.
Ang bugtong paagi aron masubay kining tanan kinahanglang ipa-ubos sa lifestyle check kining maong mga opsiyales sa kapulisan. Kay mailhan gyud baya kung sobra ba gyud ka luho ang ilang kahimtang sa panginabuhi taliwa nga gamay ra’g income.
Gawas sa mga dagkung opisyal sa PNP nga gilambigit, nganong hangtud karon wa may kisaw batok sa mga dagkung kadagkuan sa Bureau of Jail Management and Penology (BJMP)?
Niadtong Biyernes sa buntag, dunay JO2 Celso Montalba ang gipusil patay sa wa mailhi didto sa Sitio San Antonio, Barangay Guinsay Danao, kinsa nakuhaan og dakung putos sa shabu.
Ang pagpatay kang JO2 Montalba kuwang pa nga basihanan nga ang responsable sa negosyo sa drugas sulod sa mga prisohan mao ra sab ang mga personnel sa BJMP?
* * *
Nabalaka ko niining pakig-amigo ni Presidente Duterte ngadto sa mga kadagkuan sa mga rebelde ug kining iyang pakig-alyado sa mga komunistang nasud sama sa China ug Russia ug ang pag-angkon niya nga may lapso kadtong una niyang expose sa drug matrix.
Basig kini na maoy makapatun-as sa iyang liderato sa Malacañang kung dili madala sa impeachment.
Akoy gi-usikan kung dili makahuman si Digong sa iyang termino nga nakigbisog batok sa illegal drugs.
Ambot unsay iyang kapaingnan niining paglimpyo sa pangan ni Cebuano Businessman Peter Lim? Wa kahay nagpaluyo sa pagklaro ni Justice Secretary Aguirre nga si anhing Jeffrey “Jaguar” Diaz mao kunoy Peter Lim?
Sa iyang pagtoo nga posibleng ipapatay siya sa CIA sa America, lisud pa kining toho-an kay nasayod sab ang gobyerno sa USA kung unsa ka pinangga si Digong sa mga Pinoy.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
