Makatabang sa publiko ang Uber ug GrabCar

By: Lloyd Suarez, Victor Anthony V. Silva November 13,2016 - 07:21 PM

Nakasabot ko kang LTFRB-7 Director Ahmed Cuizon nga mipadayag sa iyang kahiubos ngadto sa ubang mga operator sa GrabCar ug UBER tungod kay gibirahan siya pag-ayo sa social media dihang wa na niya tugti nga maka-operate kay mando sab sa ilang ulohang buhatan sukad paglingkod ni Presidente Duterte.

Si Director Cuizon nga mitunga sa among programang “Dialogue On The Air” sa DYSS Super Radyo nga nagtuki sa operation niining matang nga transport system, miingon nga grabe gyud ang mga birada batok kaniya. Ang uban personal na kaayo.

Matud niya nga wa pa gani himoang legal ang operation sa GrabCar ug UBER apan mga abusado na kaayo ang ubang mga operator ug way respeto sa ilang buhatan.
Iyang gipasabot nga wa gyud siya’y mahimo kay igo ra sab siyang nagtuman sa kamanduan sa ilang chairman sa LTFRB nga maoy hinungdan nga na-pending karon ang 700 kapin ka mga aplikante pagkuhag prangkisa.

Ang nakanindot kay bisan sa iyang mga kahi-ubos anaa ang iyang simpatiya sa mga nag-operate kay usa kini ka matang sa panginabuhi.

Nanghangyo siya sa mga nag-operate nga undangon lang una aron paglikay nga di makamulta og dagko kay sumala pa gi-review pa ang mga mechanism niini. Pagkakaron matawag gyud kini og mga kolorom.

Sukad ilang gisugdan ang pagpanakop, miabot na og tulo ang na-impound.

Risgo gyud baya ang mga pasahero sa GrabCar ug UBER kay way insurance simbako kung madisgrasya.

Apan ang nakaporke lang kay daghan ang mi-patronize niini kay gawas nga mga brand new ang mga sakyanan, gi-training sab ang mga operator/driver nga tarungon ilang mga pasahero kay hatagan sab sila’g incentives sa opisina.

Usa sa mga operator sa UBER nga si Brian Savellon miklaro nga estrikto gyud ang opisina sa UBER kay ang ilang unit nga brand new dili na tugotan nga maka-operate human sa lima ka tuig.

Ning nagkaduol nga pasko, akong tan-aw dili gyud matuman ang hangyo ni Mr. Ryan Benjamin Yu sa CITRASCO ngadto sa LTFRB ug LTO nga kung mahimo, kinahanglang makadakop kining maong mga ahensiyaha og tag tulo ka units matag
adlaw.

* * *

Mag-andam-andam na lang gyud kadtong mga pamilya nga nagsalig sa ilang mga kabanay nga atua sa Amerika ug kadtong mga nagsalig dinhi sa ato sa business process outsourcing (BPO) o call center.

Akong tan-aw ipatuman gyud ni US President-elect Donald Trump ang pagpa-deport sa atong mga kababayan nga atua namuyo ug nanginabuhi didto sa USA.

Tungod kay si Trump gihatagan og mandato sa iyang mga konstituwente, iya gyu’ng tumanon ang lain niyang campaign promise nga ipabalik sa ilang nasud ang mga negosyo nga anaa sa gawas sama sa BPO nga nagkalat dinhi sa Pilipinas.

Abir tan-awon nato kung unsaon pagsulbad ni Presidente Duterte kining dakong hulga sa kahimtang sa mga nagsalig sa dolyar.

Mosaludo gyud kog samot kang Digong kung iyang mahangyo si Trump nga dili ihinayon ang mga lakang niini nga makadisbintaha natong mga Pinoy.

* * *

Samtang nagduda nako sa kuwestiyonableng pagpatay kang Albuera, Leyte Mayor Rolando Espinosa Sr. apan unsa kaha kung tinuod nga kining mga druglord nagtumo-tumo lang paglambigit sa mga police nga ilang protector aron gub-on ang gobyerno ug aron mag-unay ang atong kapolisan.

Kay mao ra ba gyud kini ang estelo sa mga sindikato.

Kinahanglang i-double check kining mga gihinganlan sa mga Espinosa ug ubang mga drug lords.

Usa sa maayong himuon sa gobyerno magtukod og usa ka task force aron maoy mo-life style check sa mga naapil sa listahan aron madali.

Delikado nga mapatay og apil ang mga inosente niiningkrusada sa presidente.

Subscribe to our regional newsletter

By providing an email address. I agree to the Terms of Use and acknowledge that I have read the Privacy Policy.
Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: Analytics, app, apps, BPM, Cebu, CHED, Commission on Higher Education, education, engineering, grab car, Higher Education, Ilocos Norte, IT, LTFRB, Manila, math, natural sciences, Philippines, science, sciences, technology, Uber

Subscribe to our regional newsletter

By providing an email address. I agree to the Terms of Use and
acknowledge that I have read the Privacy Policy.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.