Ang kalit-kalit nga pagpalubong sa patay’ng lawas ni kanhi presidente Ferdinand Marcos niadtong Biyernes sa Libingan ng mga Bayani (LNMB) sa Taguig City, nagpakita lang kung unsa ka abusado, way batasan ug insultador ang pamilyang Marcos sa katawhang Pilipinhon.
Kadto maoy ilang replica sa tinuod nilang bansagon nga mga diktadorya ug dili gyud angay’ng ilhon nga bayani ang former president.
Ang sekreto nga pagpalubong timailhan sa ilang pagkamabudhion ug dili kini hiyas sa usa ka tarong nga nangalagad. Mga way respeto sa rule of law.
Kung dili pa sila mga baga’g nawong, ila untang paabuton hangtud maresolbar sa Korte Suprema “with finality” ang isyu sa pagpalubong.
Unsa may ilang gidali-an nga kaalyado man nila ang presidente sa nasud ug may numero man sila sa Korte Suprema?
Samtang anaa pa kana’ng patay’ng lawas ni Marcos sa LNMB dili pa gyud mahimutang ang iyang kalag kay magsige pa ang mga kawsa nga siya ipa-irok diha ug ipabalhin sa laing menteryo.
Dili pa gyud matuldukan kining maong isyu kay ang mga nalupigan mohimo pa’g mga sunod-sunod nga mga rally.
Si kanhi Senador Francis “Kiko” Pangilinan namahayag nga mapalayas ra gihapon ang patay’ng lawas sa kanhi presidente sa LNMB sa insaktong panahon.
Way tinguha nga kawaton ang patay’ng lawas ni Marcos diha sa LNMB?
Nabalaka ko sa mga guwardiya sa Armed Forces of the Philipines didto sa LNMB nga posibleng mag-unay tungod sa presensiya sa patay’ng lawas ni Marcos.
Ang mga abogado sa Anti- Marcos nagtinguha nga ipa-cite for contempt of court ang pamilyang Marcos tungod sa wa pag-observe sa rule of law ug wa magpaabot nga maresolbar ang naka-pending nga motion for reconsideration.
Pero ambot kung mapa-contempt ba nga tuta man sab sa mga Marcos ang ubang mga mahistrado diha sa Korte Suprema.
* * *
Anaa pa ang akong suporta ning administrasyon ni Presidente Duterte pakig-gubat sa illegal nga drugas.
Sa akong nakita, 100 percent ang akong trust rating sa Presidente sa iyang kampanya kay puwerte na gyud ang pagka-kugihan sa atong mga otoridad.
Tungod gud sa pagka-kugihan, gipasukol si Albuera, Leyte Mayor Espinosa sulod sa prisohan ug puwerteng pataya.
Apan with all due respect sa atong Presidente, supak na gyud ko niining iyang tinguha pagpa-suspenso sa “privilege of writ of habeas corpus” nga maoy sukaranan pagdeklarar og martial law sa bisan asang parte sa Pilipinas.
Kung ang lawlessness sa Mindanao maoy iyang basihanan tungod sa latest bombing sa Davao, ang sulbad niini kinahanglang modeklarar siya og “all out war” batok sa mga bandidong sakop sa Abu Sayyaf.
Di na kinahanglan ang pag-suspenso sa writ of habeas corpus kay ang mga tawo karon misuporta sa “patay pa more” batok sa mga tinuud nga nalambigit sa drugas Mr. President!
* * *
Maayong pagka-briefing sa mga kadagkuan sa gobyerno ni Kerwin Espinosa kay miklaro kini sa mga tigbalita nga dili siya usa ka drug lord.
Kung dili siya drug lord, kuwalipikado siya nga mahimong state witness batok sa iyang ipangbutyag nga giingong mas dagku pa niya.
Wa siya mokomentaryo sa pangutana kung apil ba nga protector sa ilang illegal drug operation si Senadora Leila de Lima.
Si Kerwin nagpaabot nalang nga makakuha og immunity sa Senado ug unya na siya motribukar sa tanang mga personalidad nga nagpalibot sa ilang illegal nga negosyo.
Sa akong prediction mo-reinforce si Kerwin sa sworn statement sa iyang amahan nga si anhing Albuera, Leyte Mayor Rolando Espinosa Sr.
Andam andam mo’ng mga protector kay si Kerwin maoy hawod ning panahuna.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
