‘Nalutsan ta sa shabu sa basura’

SUAREZ

Bisan ako nagduda gyud nga plantalya lang kadtong mga basura nga gipalusot dinhi sa Sugbo ug gitapok diha sa Tingub, Mandaue gikan sa South Korea.

Nagtuo gyud ko nga mga shabu ang gihatod dinhi sa Sugbo unya gipaubanan sa mga basura aron wa nay inspection sa taga Bureau of Customs ug ubang ahensiya sa gobyerno.

Bisan si Leia Albiar, Public Information Officer sa PDEA-7, mipadayag nga posible gyud nga shabu ang gipalusot.

Si Atty. Paul Clarence Oaminal, kanhi undersecretary sa Dangerous Drugs Board (DDB) nga mitunga sab sa among programa’ng Dialogue On The Air sa DYSS niadtong Sabado, miingon nga 100% gyud ang iyang pagtuo nga nalutsan ang atong gobyerno.

Among giimbitar ang kadagkuan sa Bureau of Customs ug ang taga Cebu Ports Authority apan pakyas pagtunga.

Nakatawa lang ko sa pamahayag ni Atty. Oaminal nga kung siya pay na-presidente, iyang ipapatay ang taga BOC sa panahon nga dunay usa ka kilo’ng shabu nga masakmit gikan sa mga tigbaligya.

Sus! Pagkadaghana na untang patay sa BOC karong panahuna gikan sa paglingkod ni Duterte kung susama pa’s barugan sa abogado.

* * *

Haskang paeta sa among kasinatian niadtong Huwebes sa hapon (February 16) diha sa sementeryo sa Carreta samtang among gilubong ang among ig-agaw nga si Danilo Lataza.

Mao pay puwerte’ng uwana ug kaming tanan nangahumod na, pakyas pa gyud mi pagpasulod sa iyang lungon ngadto sa gi-assign nga nitso kay gamay ug unya lubnganan diay kadto sa mga bata.

Gawas pa, di pa gyud mi makatulod sa lungon patanos ngadto sa nitso kay ang buka may duol nga railings nga nakaali.

Sa laktod nga pagka-estorya, wa gyud siya malubong didto hinungdan nga gipangitaan og laing nitso.

Tungod sa kalangay ug tungod sa dagan sa panahon, misamot intawon kami kabasa. Nakabalhin man tuod og laing nitso pero may dakong buslot sa tumoy.

Mao nga wa ko ka agwanta, akong gipangita ang ilang caretaker ug in-charge nga si Mr. Teddy Bello.

Tungod kay dali sab kaayong nakapangayo og despensa sa nahitabo, dali lang sab namong gidawat ang iyang pangayog-pasaylo.

Maglaum ko nga di na intawon mausab ang among kasinatian ngadto sa uban.

Makapahiubos gyud kaayo kay maayo lang modawat sa insaktong bayad unya palpak ang trabaho.

* * *

Mas daghan ang pangutana kay sa tubag niining kasong pag-ambush-patay ni environmental lawyer Mia Manuelita Mascariñas-Green didto sa Tagbilaran City, Bohol.

Insakto ba gyud ang kapolisan nga ang motibo pagpatay sa abogada mao nga napagan lang sa away sa iladong pamilya nga nagkabangi sa yuta sa beach resort diha sa Panglao, Bohol?

Kinahanglan pa ba nga ipapatay ang biktima nga giingong dumadaog sa kaso nga unta ang papel sa abogada mao ra man ang pag-ayuda sa kaso?

Ang pagpatay sa abogada, makatabang ba sa habig sa kontra nga bisan unsaon makabarog man ang asunto kay duna may ebedensiya? Gawas pa, maka-hire man og laing lawyer.

Dili sa ingon nga akong gibugnaw ang kapolisan sa ilang gisubay nga anggulo, apan kinahanglang segurohon gyud kung kining duha ka mga suspetsado nga ilang gipangita mao ba gyud.

With all due respect, mabaw ra gyud kaayo ang rason nga apilon sa away ang mga abogado. Dili intawon modagan ang kaso sa korte kung way abogado nga nag-representar sa masig ka habig.

Wa kaha makaligis og laing personal nga problema o negosyo ang biktima?

Gawas pa sab niini, kung seryoso ang kapolisan sa ilang gisubay nga anggulo, nganong ila ma’ng gipagarpar dayon sa publiko nga nailhan na ang mga suspetsado?

Ang kaso dili gyud masulbad sa dinali-dali.

Mangambot lang sab ko sa giingong testigo kung nakamay-ong ba gyud sa nawong sa mga suspetsado atol sa krimen nga nakabatyag sa tumang kahadlok.