Go na sa eleksiyon kay gipanghipos ning mga kapitan?

SUAREZ

Gidimalas na karong mga panahuna ang ubang mga kanhi ug aktibong mga opisyales sa barangay nga anaa sa drug watch list ni Presidente Duterte kay gipangtiklo ug gipangdakop.

Dinhi sa ato sa Sugbo sila si Kapitan Rene Olivar ug Konsehal Rex Baterna sa Lamintak Norte, Medellin nangasikop human positibo sa pagpangronda niadtong Huwebes sa gabii. Gikonsiderar sab ni silang mga high-value target.

Si Kapitan Olivar kinsa presidente sa ABC Medellin ug Konsehal Baterna giingong financier sa usa ka drug pusher nga napatay sa mga pulis sa engkuwentro nga si Kim Invento.

Ang kapitan nga miangkon nga mosuyop og shabu nakuhaan og 45 kalibre ug expired nga lisensiya apan ang konsehal nakuhaan og 38 revolver ug mga shabu nga sobra 5 gramos. Sa laktod ang kapitan makapiyansa sa kaso.

Samtang didto sa Aparri, Cagayan ang ilang kanhi ABC president nga si Julio “Bong” Disierto ang gipusil patay sa tulo ka mga tawo sulod sa ilang panimalay niadtong Biyernes.

May kalambigitan sa drugas ug pagpanimawos ang krimen kay may kasong pagpatay ang maong kanhi kapitan.

Didto sa Isabela, niadtong Biyernes gihapon sa managlahing kaso, ang mga drug surrenderer nga sila si Kapitan Elpidio Pagallaman sa Barangay Calamagui, San Pablo ug Konsehal Crisanto Aranda sa Barangay Rizal, Naguilian pulos gipangtipi sa wa pa mailhing mga suspetsado.

Kining dinakpanay ug mga patay sa mga opisyales sa barangay nga naglambigit og droga maoy go signal nga idayon karong Oktubre ang Barangay Elections?

Way plano ning mga kapitan nga anaa sa watch list nga mo-leave lang una kay peligro?

* * *

Niadtong Sabado atul sa akong programa’ng “Dialogue On The Air” sa DYSS Super Radyo akong na-one-on-one ang tigpamaba sa Department of Public Works and Highways (DPWH-7) nga si Marie Mignon Nillama.

Ang focus sa discussion nag-sentro unsaon pagsulbad kining problema sa grabeng traffic sa Metro Cebu.

Sa ilang habig sa DPWH, gitinguha nila karon nga matukod g’yud ang Metro Cebu Express Way nga kini ubos pa karon sa feasibility study.

Ang kalsada mao ang proposal ni late vice governor Greg Sanchez nga gitawag kaniadtu ug Trans Axial Highway nga adto kini sa tunga-tunga sa bukid nga magdugtong sa southern hangtud sa northern Cebu.

Gawas niining maong proyektu, nahuna-hunaan sab ang pagbutang og mga access roads.

Pero akong tan-aw dugay pa kaayo kini’ng matuman.

Gi-angkon usab sa opisyal nga lisud na kaayong mapalapdan ang mga kalsada sa dakbayan sa Sugbo kay maabtan og tag napulo ka tuig ang pag-acquire og road right-of-way.

Mao nga akong gisugyot ngadto sa taga DPWH nga ibalik kadtong proposal nga magbutang kita og mga flyover sa mga crossing nga dagkung kalsada.

Kung supakon gihapon niadtong pundok nga Movement for Livable Cebu, usbon nalang ang proyekto ngadto sa under pass.

Gawas niini seryoso ko sa akong sugyot ngadto kang DPWH Director Ador Canlas nga iyang estoryahon ang mga mayor sa Metro Cebu nga ipa total ban ang mga tricycle, trisikad, habal-habal ug mga vendors sa mga national roads nga dagku kaayong contribution sa problema sa traffic.

Unya ipa-putol na intawon kanang mga punoan sa kahoy nga nagbarog sa tunga-tunga sa mga kalsada.

* * *

Nag-ulan sa mga luha niadtong Sabado sa buntag didto sa Iloilo City atol sa send-off ceremony sa 400 ka mga miembro sa 82nd Infantry Battalion sa Philippine Army paingon sa gubat sa Marawi City.

Wa kalikaye nga nag-emotional ug puno sa mga kabalaka ang mga family members sa mga sundalo kay dili banga ug tadyaw ang mga sakop sa Maute terrorist group.

Simbako mahurot ang atong trupa, asa man tuod manguha si Presidente Duterte?

Mag-andam-andam ang mga mi-gradwar sa ROTC nga mga reservists sa Armed Forces of the Philippines?

Ang ako ba nganong lig-on pa man gihapon ning trupa sa Maute nga hapit naman mag-usa ka buwan ang giyera?

Wa kahay taga gobyerno nga mi-supply og pagkaon ug mga bala sa mga terorista?