Deniece

The niece of the who? No. The granddaughter of the what? Ah, never the mind.

Dili kataw-anan? Sorry. Lisud kuno ang pagpakatawa. Namatikdan ko kining maong kalisdanan sa mga pakatawa sa ABS-CBN. Sa ako lang pagsabot murag naglisud pag-differentiate ang maong network sa sexy ug sa kataw-anan. Ang ilang comedy shows mas daghang pakigol kay sa pakatawa. Kana ra tingaling segment ni Jason diin iyang gi-suon-suon si Boy Abunda ang medyo maka-lingaw.

Makakatawa ko og gamay ni Pokwang pero maglisud kog katawa ni Vice Ganda. Dihang nakit-an ko si Vice Ganda sa usa ka press conference naka-ingon ko nga siaw ug sipat man diay ning bayota. Naka-ingon ko nga abtik ug igmat ang iyang panghunahuna. Apan nganong maglisud man kog katawa sa iyang mga programa? Tingali may disgusto lang ko sa comedy bar type of humor. O basin sag di lang kaayo mohaum sa formula sa ABS-CBN ang natural nga mga binuang ni Vice Ganda.

Dihang nitan-aw kos mga display sa DVD sa Fuente area, dunay TV nga mipakita og usa ka salida ni Vhong Navarro. Mipa-sigasiga sa iyang mata ug mipa-gubaguba sa iyang nawng si Navarro nga pina-Jim Carrey, apan daw walay emotional depth ang facial exercise nga gihimo ni Navarro. Wa ko malingaw, apan ang mga bata duol sa akong tiilan nangatawa nga daw gihadla. Tungod tingali sa akong pagkatiguwang nga daghan na akong nakit-an di na ko mahagwa. Sama kang Vice Ganda, daw gipugos sila sa ilang network paghaum sa usa ka formula.

Maayo mosayaw si Navarro ug gani, may purohan kining mahimong maayong actor. Apan alang kanako, dili siya kataw-anan.

Ug labaw pang dili kataw-anan ang nahitabo kaniya.

Gigapos ug gikulata si Navarro sa mga kauban sa gituhoang uyab sa babaye nga miingong gisuwayan siyag lugos ni Navarro.

Denise Millet Cornejo, matud pa ni Navarro ang pangan sa maong babaye. Denise Millet Cornejo? Dili. Denise Milinette Cornejo? Ah, Deniece Milinette Cornejo. Wrong spelling wrong.

Giingong apo kini siya ni Felipe Gozon nga chairman sa GMA. Ah, apil nis network wars? Dili. Dili ni siya apo ni Gozon. Apo kuno kini sa pag-agawan sa usa ka dakodako sa GMA nga Cornejo ang apelyido nga paryente sa amahan sa anak ni Mel Tiangco. Lubog? Mora.

Sama sa tanang kuryoso, gi-google ko dayon ang ngang Deniece Milinette Cornejo. Ug mibutho dayon ang hulagway sa usa ka commercial model nga puti og panit, gamayon og mata ug taas kaayog ilong. Pinocchio? Vicky Belo? Matud pas among editor, usa sa timailhan sa retokadong ilong mao nga gagmay na ang mga lungag niani.

Sa pagkakaron, gasige pa kog tan-aw sa mga lungag sa iyang ilong, sa iyang mga hulagway sa iyang Facebook nga napuno nag tungo ug balikas kun proportionate ba kini sa ilong og nawng.