SUAREZ
Kasub-anan ang pasko sa mga pamilya sa Eastern Visayas nga biktima sa pagkuso-kuso sa bagyong Urduja.
Duna gyu’y nangamatay didto ug grabe ang nahimong kadaot sa mga kabtangan ug mga tanom.
Bisan sa mga mountain barangays dinhi sa dakbayan sa Sugbo dunay mga sweet corn nga nangahapay. May mga mangga ug punoan sa kahoy ang nangatumba.
Didto sa Northern Cebu nakamugna sab og total blackout ug may mga pamilya nga gipabakwit.
Apan mas kulba kining ikaduhang bagyo nga si “Vinta” kay mas kusog. Andamanan gyud.
Sumaa pa ni PAGASA Director Oscar Tabada, si “Vinta” makaibot sa mga balay nga gama sa light materials unya makatumba na sa mga dagkung puno-an sa kahoy.
Gibana-bana nga moigo kini karong Miyerkules o ba kaha sa Huwebes.
Unsaon nalang kung madayon kining bagyong “Vinta”. Dili ba kaha intawon kini makapaluya kanato sa pagsaulog sa pasko.
Kinsa may ganahan maglipay-lipay kung may dautang mahitabo sa atong pamilya?
Maglaum ko nga mopatuman ang gobyerno og mga lakang aron way disgrasya sama sa pag-gaid sa mga barko, pagkanselar sa mga flights, force evacuation sa mga peligrong lugar ug uban pa.
Maayo unta nga dunggon atong mga pag-ampo sa Kahitas-an nga dili ipahinayon ang bagyong Vinta.
* * *
Nahurot na gyud akong bilib ni Monsignor Roberto “Boy” Alesna isip kura paruko or team moderator sa Team of Pastor sa Archdiocese Shrine of Saint Therese sa Barangay Lahug ning atong dakbayan.
Sukad nga siya maoy nagdala sa Simbahan paspas gyud kaayo ang paglambo. Napanindot niya pag-ayo ang sulod, ilabina ang altar, ug gipa-aircon.
Ang laing kalampusan sa Simbahan, nahatagan niya og desente nga CR ang mga manimbahay.
Ang sobra gatos ka mga lingkuranan (bench) iyang gipasinaw pag-ayo ug gibag-ohan ang mga ludhanan.
Ang nakanindot pa gyud kay nagpadayon karon ang pagpanindot ug pagbag-o sa atubangan sa Simbahan ug iyang ipabildo uban sa mga bag-ong nawong ni Saint Therese ug mga ginikanan.
Laing proyektu nga ipatuman ni Monsignor Alesna mao ang pagtukod og duha ka andana nga parking area diin gastuhan og 6 milyones pesos, ug ang nakanindot kay giangkon ang maong kantidad sa usa lang ka pamilya.
May rason gyud diay nga tabangan kining iyang “light a bulb project” nga gisugdan niadtong Sabado sa unang Misa de Gallo tungod sa akong mga nakita nga kaayohan ug kausaban.
* * *
Miulbo gyud intawon ang kaspa ni Capitol Provincial Social Welfare and Development Officer Marivic Garces sa usa ka blind item nga napublikar nga nagdaot sa iyang pagkatawo.
Usa ka nagpailang Mabel Rivera ang misuwat kang Sir Bobby Nalzaro sa DYSS ug sa Sunstar Superbalita, nga nagbutyag sa giingong anomaliya sa opisina ni Garces.
Ang alegasyon mao nga gigamit ni Garces ang mga bond paper sa Kapitolyo alang sa iyang libro sa masteral ug nanugo pa sa iyang mga staff paghimo sa libro gamit ang oras sa trabaho sa gobyerno.
Si Garces nga nagpa-interview sa akong radio program sa DYSS Super Radyo miklaro nga bakak kining tanan ug igo ra gyud siyang gidaot.
Sumaa pa niya nga wa pa intawon sila maghimo og libro kay bag-o pa nagsugod ilang klase.
Sumaa pa ang isyu naggumikan kini sa mga pagbayloay og mga komedya sa iyang mga staff nga nadunggan ni Mabel bahin sa mga bond paper.
In fairness ni Garces andam niyang atubangon kung mo-imbistigar man si Governor Junjun Davide sa isyu.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
