SUAREZ
Happy New Year kanatong tanan! Segurado ko nga matag usa kanato dunay tagsa-tagsa ka mga damgo ug pangandoy nga mas malamboon ang atong kinabuhi ning tuig 2018.
Sama sa gipagawas nga survey sa Social Weather Station (SWS) nga daghan ang mipadayag nga mas malamboon ang kinabuhi ning tuiga.
Ang mga positibo og huna-huna nga maayo ang dagan sa kinabuhi mao kadtong mga nagpaduol sa Ginoo, may abilidad, kugihan, way bisyo ug daginotan.
Segurado sab ko nga kadtong mga nagpadayag nga medyo apiki gihapon ang kinabuhi alkontra sa una nakong premise. Mao kadtong mga tawo nga hilabihang pagkatapolana gyud nga nagpaabot nga hungitan.
Mag-unsa man gud kanang mga palihi sa sugat sa Bag-ong Tuig nga dili ubanan og kugi?
Kining kinabuhi, depende ra gyud sa pagpanlimbasug ug paningkamot.
Ang importante, kugi, kayod ug paningkamot. So, kumbate gyud ta pagpanikaysikay sa laing hagit sa kinabuhi.
* * *
Kaniadto pa gyud ko nanawagan nilang Governor Hilario Davide III, Congressman Samsam Gullas sa unang distrito, ug mga mayor gikan sa dakbayan sa Talisay paingon sa Carcar nga kinahanglan i-ban sa national highway kining mga tricycle kay maoy nagdalag traffic.
Mao sab didto paingon sa norte.
Kadtong pagka Sabado (Dec. 23) nga pinakagrabeng traffic nga milanat og lima ka oras pagtabok lang gikan sa Talisay paingon sa Minglanilla, plus factor na kadtong upat ka managlahing traffic accident sa area sa Minglanilla nga dugay kaayong girespondehan sa mga oplok nga traffic personnel.
Naa pay mga inutil nga traffic light sa mga eskina diha sa Minglanilla.
Pun-an pa sa mga vendor nga anaa sa kilid sa national highway ug parkingan pa sa mga abusado ang kalsada.
Kung sulbad man ang pagbutang diha og mga flyover sa habig sa Minglanilla nganong haguka man kaayo ang liderato ni Congressman Gullas?
Asa naman to ang plano pagtukod og MCDA kon Metro Cebu Development Authority? Sige lang ta sa plano way implementasyon?
* * *
Akong gilauman nga wa nay putol ang kapolisan sa ilang mga anti-illegal drugs operations sa tibuuk nasud ilabina dinhi sa Sugbo.
Wa gyud ko malipay sa miaging tuig niadtong duha ka hugna nga gi-suspenso ni Presidente Duterte ang participation sa Philippine National Police sa kampanya sa illegal drugs kay daghan ang namalik kay wa makaya sa man power sa Philippine Drugs Enforcement Agency (PDEA).
Akong subli-on nga kining war against drugs, dili kalikayan nga dunay mga inosente nga maangin.
Paglikay nga way mapagan, panahon na nga ang mga tarong nga miembro sa pamilya dili na mag dupa-dupa sa ilang mga sakop nga tig-gamitan ug tigbaligya’g drugas aron dili sila mapagan.
Daku kog pagtoo nga kining kampanya sa Duterte administration ning tuiga batok sa illegal drugs maoy labing perfect ug mas dugoon sa mga manukol.
Busa kadtong magpadayon sa illegal drugs, good luck nalang samtang congratulations niadtong hingpit nang mi-undang.
* * *
Tun-an ni Cebu Provincial Prosecutor Pepita Jane Petralba kung angayan bang magtukod og investigating panel aron maoy mo-conduct og preliminary investigation batok kang Winefredo Miro kinsa maoy gitumbok nga mastermind sa pag-ambush-patay kang Ermita Barangay Captain Felicisimo Imok Rupinta.
Iyang tan-awon kung unsa ka komplikado ang mga isyu sa kaso batok kang Miro.
Apan kung tan-aw niya nga makaya ra og usa ka piskal, dili na kinahanglan nga mag-panel.
Abir, tan-awon nato kung makapakonbikto ba ang mga ebedensiya sa taga Regional Intelligence Branch (RID).
Dili kaha mo-resort og pinatyanay diha sa Ermita tali sa pamilya’ng Rupinta ug Miro samtang nagka-init na kining maong kaso karon?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
