Gikapoy na sila ug di na sila buot nga mokiat ka pa

Gerard Pareja

Ang ulohan ning atong lindog karon maoy obserbasyon sa kadaghanan kabahin sa mga miintra sa miaging Sinulog.

Tingali wala akoy katungod nga mohatag sa akong panahom tali sa miaging pagsaulog kay, sa akong katapulan, wala man ko mosuroy sa kadalanan niadtong miaging Domingo sa hudyaka.

Apan ang akong gibating ka way ganang mosuroy nga mao say gibati sa mga ingon nakong dagkog tiyan daw mitakod sa mas batan-ong mga partisipante sa maong presentasyon. Daw, matud pas mga kaila kong nanambong, gilaayan sila. Daw gipul-an og wa nay gana.

Usa tingali sa hinungdan mao ang panahon nga sigi lang ga dag-um.

Ang laing rason mao nga wala na kunoy judging sa kadalanan. Hinungdan nga mopaso na lang ang mga nangintrahay ug dili na mo salida. Ug nga tungod niani wala na kaayo nalingaw ang mga nan-away sa kadalanan. Mauraura na lag ordinaryong parade ug dili na street dancing ang nahitabo.

Miabot nag 48 years ang Sinulog. Tingali duna nay collective psychological fatigue ang mga suki nga intrante niani. Gibati usab tingali kini sa ubang manan-away. Basin og na anticipate na kini sa mga organizer mao nga gipamahal nilag maayo ang registration fee sa photo contest. Agig panagang kon ingaksog mogamay ang mga mangintrang maniniyut.

Na dismaya ang usa kong kailang maniniyut dihang nabantayan niya nga dili ang mga kandidata sa Festival queen maoy nanguyog sa parade. nigamit og proxy dancer ang mga tribo. Maura silas mga Romano nga miawhag ni Simon de Cyrene pag alsa sa krus dihang natumba na usab si Kiristo.

Gitapulan nga tingali ang atong mga kadalagahan. O di ba kaha hinuon dagko na ang ilang gipangayong talent fee og dili na maka afford ang mga intranting tribo paghatag sa ilang gipangayo para mag warawara sa imahin sa patron. Daw wala nay mga mga maanyag nga dalaga nga magpainit ug magpaulan para sa Sinulog bisag walay bayad.

Puna-an pa nga wala nay float para sa mga winner sa Miss Cebu.

Gi minusan kuno sa mayor ang mga intrante ug gitangtangan usab og mga float ang maog pagsaulog. Maingon ta ba nga retire-able festival na ba ang Sinulog nga going through the motion na lang ang show? Ambot. Dili pa man tingali. Pero daw may madunggan kang tingog nga moingog “padayon pero ay lag kiat.” Ang Sinulog nanginhanglag “shot in the arm,” kon sa Ininglis pa.

Kon gikapoy na ang mga tao sa atong dakbayan ning maong kasaulogan, maayo tingaling ipasa nila kini sa laing mga lungsod para makatilaw usab ang uban sa kasadya ug kaguliyang nga dala niani.