Way kiha batok sa mga kuwadro alas ug kang Gov?

SUAREZ

Mas maayong ikiha gyud aron maklaro kaysa pulos lang mga alegasyon.

Nahimo’ng bati karon ang administrasyon ni Cebu Governor Junjun Davide tungod sa giingong mga anomaliya sa upat (4) niya ka mga opisyales nga gitawag og mga “Kuwadro Alas” nga giingong mga bagman sa gobernador.

Unsa ka tinuud nga kini maoy daku’ng hinungdan nga mi-slide nalang si Gov Junjun pagka bise gobernador?

Sa mga impormasyon kaniadto, ang pagpatangtang sa upat maoy gipangayo nga kondisyon ni Vice Governor Agnes Magpale aron mopadayon siya nga makig-uban kang Governor Davide.

Pero sa akong interview ni Magpale iyang giklaro nga wa siya’y gi-set nga mga kondisyon sa iyang padayong pakig tandem ni Governor Davide.

Buot ba’ng sabton nga nakonbinsi si Magpale nga way anomaliya ang upat ka mga opisyales? Or mipatuman lang og cease fire si Magpale tungod lang sa bugno sa pulitika?

Ang upat ka mga opisyal nga kanunay’ng mahisgutan mao sila si Provincial Administrator, Atty. Mark Tolentino, Jone Siegfred Sepe, head sa Provincial General Services Office (PGSO), Jesus John Cobar – consultant ug ingon man si Baltazar Tribunalo Jr. kanhi hepe sa Provincial Environment and Natural Resources Office (PENRO) ug kinsa karon maoy nangulo sa Provincial Disaster Risk Reduction and Management Office (PDRRMO).

In fairness ani nila akong na-interview niadtong Miyerkules si Tribunalo ug miklaro nga dili intawon tinuud kining mga pasangil.
Sumaa niya nga wa sila malambigit sa mga corruption kay tinarong ang ilang pagpangalagad ug above board ang tanang transaction sa Kapitolyo.

Matud ni Tribunalo nga wa gyud silay mga binuang ug gani way report ang Commission On Audit (COA) nga duna silay mga tinunto.

Iyang gi-angkon nga nadisturbo gyud siya ug iyang pamilya sa mga pasangil apan kinahanglang dili siya magpa-apektar kay mas daghan pa’ng mga butang nga angayang hatagan og pagtagad.

Sumaa niya nga Ginoo nalay mag-igo niadtong mga tawo nga dili makonbinse sa iyang tubag.

Bahin niadtong alegasyon nga midawat siya sa mga appliances nga gi-donate sa usa ka sand and gravel hauler iyang giklaro nga dunay insaktong mga papeles ang pag-donate ug gawas pa wala niya pahimusli personal ang maong mga butang.

Iyang gitoho-an nga pamulitika lang gyud ang tumong aron dauton si Governor Davide kay bisag taud-taud na ang isyu gibalik gihapon ning nagkaduol na ang eleksiyon.

Ako nagtoo nga mapuno sa kiha sila si Governor Davide sa kampo nilang kongresista Gwen Garcia kay magamit kaayo kining maong isyu.

Ambot lang kaha kung di ba gamiton kining mga isyuha aron ipa-suspenso si Governor Davide sa Malacañang?

Kung mahitabo man, bawos-bawos ra gyud ang panahon.
* * *
Akoy gingisli-an nga nagtan-aw sa video nga gi-share sa among group chat sa DYSS Super Radyo niadtong Sabado nga ang title “Mga bayot sa bangkal gipamatay sa Muslim kay nagpagamit wa mamayad”.

Grabe gyud ka brutal ang pagpatay sa duha ka mga biktima kay human nawad-an og mga panimoot gipangtupad ang ilang mga lawas unya gitagsa-tagsa pagtusak-tusak sa kutsilyo ang ilang mga liog ug mga nawong nga daw sama sa gipunggutan ang mga liog.

Ang Police Regional Office-7 misubay ning maong balita diha sa dakbayan sa Lapu-Lapu sumaa pa kang Supt. Maria Aurora Rayos bag-ong Public Information Officer sa PRO-7.

Sa video nga molungtad og 1 minute and 30 seconds dunay tingog sa nag-video nga lalaki samtang mimaniho ang laing lalaki sa pagtusak-tusak.

Pero sa audio dili bisaya ug dili tagalog ang lingguwahe.

Maglaum ko nga masubay kini sa atong mga otoridad aron maklaro kini kung dinhi ba gyud sa Sugbo nahitabo ang linoog nga krimen.