SUAREZ
Nakadayeg ko sa gipakitang labok karon ni Cebu City Police Director, S/Supt. Royina Garma nga nangunay gyud pagpahigayon og surprise inspection sa 11 ka mga police stations.
Sa kalit-kalit nga pagbisita ni Garma, duna gyu’y 20 ka mga pulis ang nasakpan nga nangatulog bisag duty, nagdula’g billiard ug games of thrones sa ilang mga cellular phones ug wa maka proper uniform kay nanaghibat ang mga sinul-oban.
Nadamay intawon ang lima ka mga chief of police sa Parian, Guadalupe, Carbon, Mabolo ug Abellana. Ma-igo sila sa command responsibility.
Ang mensahe mao nga kinahanglang naka red alert ang atong kapolisan kanunay 24/7.
Ayaw mo’g kompiyansa. Ayaw mog tulog-tulog sa pansitan kay wa mangatulog ang mga criminal.
Hinoon ginagmay ra ni’ng mga isyuha. Ang importante nga kining mga pulisa wa malambigit sa illegal nga drugas.
Simple ra hinoon ning tubagon, ang rason mao nga magdulag cellular phone aron pawala sa duka unya ang nakatulog kay di gyud makaya ang 24 hours duty. Samtang ang wa magkadimao pagsul-ob sa uniform ug way kalo kay dunay mga piniriso nga nilugnot mao nga gigamitan ug saktong puwersa mao nga nangagusbat ang uniporme. Hahahaha.
Maayo gyud unta nga kung unsay ilang patakaran, kinahanglang mosubay ang mga miembro sa kapolisan.
Ang importante gyud kanang alerto sila pirme. Ang ubang pulis magkawat-kawat og katug sulod sa patrol car unya blinker ray pasigaon aron ingnon nga anaa ilang presensiya. Paet!
* * *
Grabeha na gyud karon sa mga intriga sa Provincial Capitol samtang nagkaduol na ang bugnong lugaynon.
Dunay gipalakaw nga estorya nga i-revamp ang mga department heads sa Kapitolyo.
Niadtong Sabado akong gitawgan si Governor Junjun Davide pagsubay ning maong isyu.
Apan sumaa niya nga dili gyud kini tinuud kay nagpabilin ang iyang trust and confidence sa mga department heads.
Alang nako maapektahan pud ang panerbisyo sa mga Sugbuanon kung ipatuman kini kay ang matag opisyal dunay kanya-kanya nga expertise sa ilang job description.
Dili ba mahimong kataw-anan kung ang usa ka doctor maoy ibutang sa legal division?
Dili ba salikwaot paminawon kung ang usa ka disaster personnel ibutang sa accounting office?
Labaw na gyu’ng maot nga paminawon kung ang usa ka abogado maoy magdala sa engineering works.
Ang akong advice sa atong mga opisyales ug mga kawani sa gobyerno mao nga tutok lang sa trabaho aron kaserbisyohan og tarong ang publiko.
* * *
Wa ko maka-uyon sa pinulis nga paagi ni retired General Cecille Ezra Sandalo sa pagpalayas sa 21 ka pamilya nga kasamtangang gipahiluna diha sa Tabunok Complex sa dakbayan sa Talisay.
Dili gyud maayong gamitan og psychological warfare or psywar ang mga tawo nga namiligro ang kinabuhi sa ilang gipuy-an didto sa Sitio Tigib, Lagtang, Talisay.
Ang maayo, estoryahan og tarong. Unya dialogue gyud.
Kung dili kaya sa local nga kagamhanan sa Talisay pagsulbad niining mga pamilya nga gipabakwit, naa may mga national line agencies nga puwede’ng maka take over.
In fairness sa 21 ka pamilya may ponto nga dili gyud sila mobalik didto sa Sitio Tigib taliwa sa mga mitigating measures ug engineering intervention sa ilang komunidad kay mismo si Ellen Lupo, OIC Chief Geologist sa Mines and Geosciences Bureau sa DENR-7, miingon nga high susceptible sa landslide ang maong lugar basi sa ilang geo-hazard mapping ug actual inspection.
Mismo si Alvin Santillana ang head sa Talisay City Disaster’s Office mikompirmar nga taga hawak ang tubig sa mga panimay panahon nga mag-uwan diha.
Luoy tawon kaayo ang kahimtang kay baha ug landslide ang gi-atubang nga risgo sa mga residente.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
