Daghang mireklamo sa langay nga suspension

Super Hirit

Unsay problema ni Cebu City Mayor Michael Rama kagahapon sa buntag nga naulahi man pagpasuspenso sa mga klase sa tanang mga public schools dinhi sa dakbayan sa Sugbo?

Napasubo intawn ang mga ginikanan paghatod og sayo sa mga anak sa tagsa-tagsa ka mga tunghaan unya takulahaw lang nga ipakanselar ang klase pagka-udto.

Kung managana man gani ta, kinahanglang sayohon ang deklarasyon nga way klase.

Ang maayo unta nga nagpahibawo na siya sa publiko niadtong Lunes pa nga wa na lay klase kagahapon nga Martes tungod sa laing bagyo nga si “Zoraida” kay atong nahibaw-an nga giisa sa storm signal no. 1 nianang Lunes pa sa hapon ang southern Cebu.

Pero para nako kun kaya lang sa mga ginikanan ug mga estudyante bisag signal no.1 or no. 2, mas maayo tingali nga dili na suspensohon ang klase kay samot na kadehado sa leksiyon ang mga bata.

Hangyo lang sab ko sa mga magtutudlo nga unta dili pasobrahan kadaghan ang assignment sa mga estudyante ilabina karon nga pirmi pa kitang magsukarap sa kagabhion tungod sa padayong rotational brown out nga gipatuman sa Visayan Electric Co tungod sa kakuwang sa supply sa kuryente.

Kun may homework man kinahanglang ipahimo na lang daan sa eskuwelahan inig ka hapon.

* * *

Wa gyuy maayong laki basta kalamidad na maoy atubangon sa tawo.

Kita gani dinhi sa dakbayan sa Sugbo nga wa kaayo maapektohi sa bagyong “Yolanda,” tiyabaw man gani sa rotational brownout nga gisugdan na niadtong Lunes ug niining kakuwang sa supply sa tubig.

Subo kaayong palandungon kay among kauban nga magsisibya sa dyVL Aksyon Radyo Tacloban nga si anchorman Ronald Vinas ug iyang technician nga si Al Mendiola pulos nakompirmadong patay human gibanlas ilang sibyaanan sa storm surge.

Missing sab ang tulo nila ka mga drama talents nga mibakwit sa ilang sibyaanan.

Two-story building ang sibya-anan nga anaa nahimutang sa costal area sa barangay Poblacion, Tacloban City ug segun pa nag-cover sila niadtong higayona pag-landfall ni “Yolanda.”

Gawas sa among mga kaubanan sa radyo dunay trabahante sa Philippine Atmospheric, Geophysical and Astronomical Services Administration (Pagasa) nga si weather observer Salvacion Cruz nga missing.

Ang presidente sa employees’ association sa Pagasa nga si Ramon Agustin miingon nga naka-report pa si Cruz pag-land fall ni “Yolanda” apan gibanlas sab kini dihang naigo sa storm surge ang ilang station apil ang ilang Doppler radar ug ubang ekipos sa Pagasa. Pagkapait gyud!

* * *

Pwede kasohan ang mga responsable sa “looting” kun pagpanglungkab ug pagpangawat sa mga establisimyento didto sa Tacloban City, apan lisud pagkonbikto ilabina nga sabtonon kaayo ang sitwasyon human sa bagyong “Yolanda.”

Tig-a na gyud kaayo og balatian nga gukdon pa gyud ang mga mihimo ilabina nga pagkaon maoy unang gikinahanglan niadtong tungura.

Gani kita dinhi sa Sugbo, naglumba man gani og linya pagpalit og pan ug mga makaon human sa unos bisag dili kaayo kita stressed kay kompleto pa atong mga sakop sa pamilya ug duna pa kitay kapuy-an.

Kun naapil man og kuha ang mga appliances segurado ko nga andam mouli ang mga tawo nga mikuha kana kun moapelar ang tag-iya sa mga tindahan nga ipauli.

Akong usbon makatarunganon ang “looting” sa Tacloban kay gawas nga nawad-an sila og paglaum dugay kaayong nakatabang kanila ang taga-gobyerno.

* * *

Ambot kun kinsay namolitika sa sitwasyon didto sa Medellin?

Kun si Mayor Ricky Ramirez maoy pasultihon, si Vice Gov. Agnes Magpale sa Liberal Party maoy namolitika kay gisal-angan ilang lungsod sa pagpang-apod-apod sa mga relief goods kay bisan usa ka putos wa gyuy nadawat.

Pero depensa ni Magpale nakapanghatag sila og apil sa Medellin ug dalang maymay nga ubos sa polisiya sa National Disaster Risk Reduction and Management Council nga sa unang duha ka adlaw ang local government unit concerned maoy responsable sa pagtabang sa mga biktima unya ang probinsiya na maoy mohatag sa ikatulong adlaw.

Kun mao man kini ang “policy,” nganong nanghatag man ang taga-Kapitolyo ngadto sa mga lungsod nga ilang kaalyado?

Kun tarong pa sab si Mayor Ramirez, nganong wa man siya manawag nilang Magpale aron siya maoy mo-coordinate sa pagpang-apod-apod?

Hangyo lang ko ninyo nga ihikling intawn ang pamolitika panahon sa kalamidad kay mosamot kalagot nato ang Ginoo!

Pagbaton kamo og kaulaw. Kwarta sa katawhan iuli sa katawhan. Kun mamolitika kamo, hala gamita inyong personal nga kwarta alang sa inyong interest!